Имрӯз дар саросари ҷумҳурӣ Рӯзи забони давлатӣ ҷашн гирифта мешавад.
Раиси шаҳри душанбе Маҳмадсаид Убайдуллоев ба Раёсати фарҳанги мақомоти шаҳрдорӣ супорш додааст, ки дар ҳамдастӣ бо дигар мақомоти давлатӣ дар боғу хиёбон ва гулгаштҳои шаҳри Душанбе ба ин муносибат чорабиниҳои идона созмон диҳанд.
Чорабиниҳои идона дар боғҳои фарҳангу фароғати Рӯдакӣ, «Боғи Пойтахт», «Дӯстии халқҳо», «Кӯли Комсомол», «Садриддин Айнӣ ва майдони «800-солагии Маскав» баргузор мешаванд.
Мақомоти ҳифзи ҳуқуқ ба таъмини амнияти шаҳрвандон ва тартиботи ҷамъиятӣ дар ҷараёни чорабиниҳои идона муваззаф шудаанд.
Ёдрас мекунем, ки дар таърихи 5-уми октябри соли 2009 Қонуни нав «Дар бораи забони давлатии Ҷумҳурии Тоҷикистон» қабул гардид.
Санаи 21-уми июли соли 2011 сарвари давлат Қонун дар бораи ворид намудани тағйироту илова ба қонун «Дар бораи рӯзҳои ид» ва Кодекси меҳнати ҶТ-ро ба имзо расонид. Мувофиқи ин тағйирот, аз ин ба баъд ҳамасола дар Тоҷикисон санаи 5-уми октябр ҳамчун Рӯзи забони давлатӣ ҷашн гирифта мешавад.
Қаблан шурӯъ аз соли 1989 Рӯзи забони давлатӣ санаи 22-юми июл – рӯзи қабули қонуни пешина «Дар бораи забони давлатӣ (соли 1988) таҷлил мегардид.
Қобили зикр аст, ки имрӯз ҳамчунин сарвари давлат Эмомалӣ Раҳмон зодрӯзашро ҷашн мегирад. Имрӯз сарвари давлати Тоҷикистон 61-сола шуд.
Аз соли 1992 то соли 1994 Эмомалӣ Раҳмон ба ҳайси раиси Шӯрои олии Тоҷикистон фаъолият дошт. Санаи 6-уми ноябри соли 1994 ба мансаби расиҷумҳури Тоҷикистон интихоб шуд. Солҳои 1999 ва 2006 боз ба мақоми президенти кишвар интихоб гардид.
