Рӯзи 19-уми сентябр дар Душанбе миёни Вазорати саноат ва технологияҳои нави Тоҷикистон ва ширкати Синтзян Жонтай Синсилу Нонийе Инвест дар бахши сохтмони корхонаи истеҳсоли нуриҳои минералӣ ва корхонаи истеҳсоли нуриҳои фосфатӣ ёддошти ҳамкорӣ ба имзо расид.
Тавре ба «Азия-Плюс» аз Вазорати саноат ва технологияҳои нави ҶТ хабар доданд, зери ёддошти мазкур вазири саноат ва технологияҳои нави ҶТ Шавкат Бобозода ва директори ширкати Чин Ван Чуанченг имзо гузоштанд.
«Иқтидори корхона истеҳсоли 300 ҳазор тонна нуриҳои минералӣ ва 150 ҳазор тонна нуриҳои фосфатӣ дар як сол буда, он ба сифати сӯзишворӣ аз гази тариқи синтез аз ангишт ҳосилшуда кор мекунад. Дар марҳилаи ҳозира ёддошт нияти сохтмони корхонаро ифода намуда, минбаъд ҷонибҳо ҷиҳати амалисозии лоиҳаи мазкур созишномаву қарордод ва шартномаҳои зарурӣ ба имзо мерасонанд», – гуфтанд дар вазорати мазкур.
Дар Вазорати саноат ва технологияҳои нави Тоҷикистон умедворанд, ки сохтмони корхонаи нави истеҳсоли нуриҳои минералӣ дастрасии деҳқонони тоҷик ба нуриҳои минералии хушсифат ва арзон дар дохили кишварро бамаротиб осонтар хоҳад кард.
Қобили зикр аст, ки айни замон Тоҷикистон барои қонеъ намудани эҳтиёҷоти бахши кишоварзӣ нуриҳои минералиро пурра аз хориҷи кишвар ворид мекунад. Корхонаи ягонаи истеҳсоли нурии азотӣ (карбамид) барои соҳаи кишоварзӣ – «ТоҷикАзот» соли 1964 таъсис ёфта, бинобар сабаби мавҷуд набудани гази табиӣ, ки аз Ӯзбекистон интиқол дода мешуд, аз соли 2008 аз фаъолият бозмонд.
