Дар муқоиса ба ҳамин давраи соли гузашта ба аввали моҳи сентябри соли равон ҳаҷми бақияи умумии қарзҳо дар низоми бонкии кишвар ҳудуди 30% афзуд.
Бино ба маълумоти хадамоти матбуоти Бонки миллии ҷумҳурӣ, таҳлил ва ҷамъбасти бақияи умумии қарзҳо дар қаламрави кишвар дар моҳи августи соли равон нишон додааст, ки нишондиҳандаи мазкур ба 8 млрд. 944,6 млн. сомонӣ (беш аз 1,8 млрд. $) баробар гардида, нисбат ба ҳамин давраи соли гузашта 29,9 фоиз зиёд шудааст.
«Чун моҳи гузашта дар ин давра низ раванди афзоиши қарзҳои дарозмуҳлат идома ёфта, зиёда аз 3,8 млрд. сомониро ташкил дод», – омадааст дар хабар.
Ба иттилои манбаъ, фоизҳои миёнавазни қарзҳо дар моҳҳои январ-августи соли ҷорӣ бо пули миллӣ 24,95 фоиз ва бо асъори хориҷӣ 23,23 фоизи солонаро ташкил намуданд.
«Бинобар зиёд гардидани талаботи аҳолӣ ба қарзҳои хурд ҳаҷми ин намуди хизматрасонии бонкӣ дар моҳи август раванди афзоишро идома дода, нисбат ба ҳамин давраи соли қаблӣ 28,6 фоиз зиёд шуд. Аз он ҷумла, 745,8 млн. сомонӣ ба ноҳияҳои дурдасти куҳистон қарзҳои хурд дода шудаанд, ки назар ба ҳамин давраи соли гузашта 24,1 фоиз зиёд мебошад», – зикр мегардад дар маълумоти БМТ.
