Суди ҳарбии гарнизони Хатлон ду нафар хизматчиёни қисми ҳарбии 2931-и нерӯҳои марзбонии ҷумҳуриро барои лату кӯби бераҳмонаи ҳамхизматашон маҳкум намуд.
Судяи суди ҳарбии гарнизони Хатлон Мирахсумиён Исмоил ба «Азия-Плюс» дар ин робита иттилоъ дод, ки 25-уми июли соли 2014 хизматчиёни қисми ҳарбии 2931-и нерӯҳои марзбонии мустақар дар ноҳияи Шӯрообод – Сайёд Исмоилов ва Рамазон Сафаров дар майдони варзишии дастаи марзбонии «Баҳористон» ҳамхизмати худ Нарзулло Саидовро мавриди таҳқир қарор дода, вале ба ин ҳам қаноат накарда, С.Исмоилов ӯро ба гантели варзишӣ ба сараш ва Р.Сафаров бошад, бо қундоқи автомат зарба мезананд, ки дар натиҷа ӯ беҳуш шуда, ба гсопитал мунтақил мегардад.
Аз рӯи ин ҳодиса нисбати С.Исмоилов ва Р.Сафаров мутобиқи моддаи 373, қ. 2-и Кодекси ҷиноии ҶТ (Вайрон кардани қоидаҳои оинномавии муносибатҳои байниҳамдигарии хизматчиёни ҳарбӣ дар ҳолати набудани тобеияти хизматӣ дар байни онҳо) парвандаи ҷиноӣ боз карда шуд.
Зимни баррасии парванда дар мурофиаи судӣ гуноҳи ҳарду собит гардида, суд ҳар кадоме аз онҳоро ба 2 соли зиндони низомаш шадид маҳкум кард.
