Раиси шаҳри Сарбанд Қарахони Чиллазода зимни нишасти матбуотӣ хабар дод, ки ду сокини ҷавони шаҳр, собиқ донишҷӯёни Донишкадаи тарбияи ҷисмонӣ дар ҷангҳои Сурия ширкат доранд.
«Ин ду нафар собиқ донишҷуёни донишкадаи тарбияи ҷисмонӣ буданд, ки қаблан волидайн онҳоро аз ин донишгоҳ гирифта, ба донишгоҳи исломии кишвар супурданд. Баъдан барои таҳсил ба хориҷи кишвар рафтаанд, ки онҳоро дар он ҷо гӯруҳҳои террористӣ ба худ моил намудаанд. Нисбати ин ду нафар мақомоти ҳифзи ҳуқуқ парвандаи ҷиноӣ оғоз намуданд»- илова кард раиси шаҳр.
Қаблан Ҷаббори Ғаффор, раиси ноҳияи Бохтар низ аз марги се тан аз сокинони ноҳияи мазкур дар Сурия хабар дода буд.
«Бино ба он маълумоте, ки ба дасти мо расидааст, се тан сокинони ноҳияи мо дар ҷангҳои Сурия ширкат намуда, ҷони худро аз даст додаанд» – изҳор дошта буд раиси ноҳия.
Бино ба маълумоти расмии мақомоти ҳифзи ҳуқуқи вилояти Хатлон, айни замон 31 нафар сокинони ин вилоят дар минтақаҳои даргир, аз ҷумла Сурия, Ироқ ва Афғонистон меҷанганд.
