Бо пешниҳоди президенти Тоҷикистон Эмомалӣ Раҳмон прокурори генералии кишвар Шерхон Салимзода аз вазифааш озод карда шуд.
Тибқи маълумоти дастрасшуда ба «Азия-Плюс», субҳи имрӯз дар иҷлосияи ғайринавбатии Маҷлиси миллии Маҷлиси Олии ҶТ ин пешниҳоди президентро аъзои палатаи болоии парлумон якдилона дастгирӣ намуда, ҳамчунин номзадии Раҳмонов Юсуф Аҳмедович ба ин мансабро, ки аз ҷониби президент пешниҳод шудаааст, маъқул шумориданд.
То ба ин мансаб таъин шудан Юсуф Раҳмонов ба ҳайси муовини аввали роҳбари дастгоҳи президенти Тоҷикистон (аз декабри соли 2014) ифои вазифа мекард.
Юсуф Раҳмонов 49-сола аст. Зодаи ноҳияи Восеи вилоят Хатлон. Дар мақомоти прокуратура 23 сол фаъолият кардааст. Тӯли солҳои гуногун ба сифати прокурори ноҳияҳои Сино ва Шоҳмансури пойтахт, муовини прокурори генералии кишвар, прокурори вилояти Суғд ва ҳамчунин дар Шӯрои амнияти ҷумҳурӣ фаъолият намудааст.
Зимни суханронӣ дар иҷлосияи зикршуда акнун собиқ прокурори генералии ҷумҳурӣ Шерхон Салимзода аз аъзои палатаи болоии парлумон дархост намуд, ки ба матни пешниҳоди президент дар бораи аз вазифа озод кардани ӯ тағйирот ворид намуда, ибораи «бинобар сабаби анҷоми ваколатҳо» илова карда шавад.
Дар робита ба ин дархости ӯ раиси палатаи болоии парлумони ҷумҳурӣ Маҳмадсаид Убайдуллоев изҳор кард, ки ин масъала баррасӣ мешавад ва ҳамчунин илова кард, ки «ба сурати умум, президент уҳдадор нест, ки ба мо сабаби қарор дар бораи озод карданро шарҳ диҳад».
