Бо дастгирии Созмони байналмилалии муҳоҷират (СБМ) дар шаҳри Душанбе семинари техникӣ доир ба идоракунии раванди муҳоҷирати меҳнатӣ (таҷрибаи Ҷумҳурии Молдова) бо иштироки аъзоёни комиссияи байниидоравӣ оид ба танзими раванди муҳоҷират доир гардид.
Бино ба иттилои хадамоти матбуоти Вазорати меҳнат, муҳоҷират ва шуғли аҳолии ҶТ, дар семинар муовини якуми вазири меҳнат, муҳоҷират ва шуғли аҳолии ҶТ Сангинзода Э.Н., муовини вазири меҳнат, ҳифзи иҷтимоӣ ва оилаи Ҷумҳурии Молдова Сержиу Саинчук, роҳбари миссияи СБМ дар ҶТ Тайма Курт ва намояндагони дигар вазорату идораҳои дахлдор иштирок доштанд.
Гуфта мешавад, мутобиқи барномаи чорабинӣ, дар семинари мазкур масъалаҳои хусусиятҳои умумӣ байни Тоҷикистону Молдова дар контексти кишварҳои интиқолдиҳандаи муҳоҷирони меҳнатӣ, ҷанбаҳои умумии таҷрибаи Молдова дар самти муҳоҷирати меҳнатӣ, барномаҳои миллӣ оид ба ҷалби интиқоли пули муҳоҷирони меҳнатӣ дар рушди соҳибкории хурду миёна ва ғайра баррасӣ гардиданд.
