Мақомоти шаҳрдории Душанбе нашру ҷойгиркунии рекламаи пешазинтихоботии ҲНИТ дар пойтахтро расман рад карда, онро «сиёсӣ» унвон кард.
Сухангӯи ҲНИТ Маҳмудҷон Файзраҳмонов ба Азия-Плюс» дар ин робита иттилоъ дод, ки ба дархости расмии раиси ҲНИТ Муҳиддин Кабирӣ дар ин хусус аз номи муовини раиси пойтахт Руқия Қурбонова посух расидааст.
«Муовини раиси пойтахт дар посухи худ таъкид месозад, ки қонуни Тоҷикистон «Дар бораи интихобот ба Маҷлиси Олии ҶТ» ба баргузории таблиғоти пешазинтихоботӣ тариқи ВАО, чорабиниҳои оммавӣ, нашр ва паҳнкунии маҳсулоти чопӣ иҷоза медиҳад, вале дар он ҷойгиркунии рекламаи пешазинтихоботӣ дар кӯчаҳои шаҳру ноҳияҳо пешбинӣ нашудааст ва дар меъёрҳои қонун «Дар бораи реклама» низ роҳу воситаҳои паҳнкунии рекламаи сиёсӣ зикр наёфтааст», – иброз дошт ӯ.
Қобили зикр аст, ки дар маъракаҳои интихоботии қаблии ҳам президентиву ҳам парлумонӣ дар Тоҷикистон ин қабил манъкуниҳои ҷойгиркунии шиору лавҳаҳои пешазинтихоботии тамоми аҳзоби сиёсӣ ҷой надошт.
