Ҳукумати Олмон ба геологҳои тоҷик 10 маҷмӯи техникаи компютерии муосири саҳроиро тақдим намуд, ки бо барномаҳои навтарини муосир таъмин мебошанд.
Бино ба иттилои хадамоти матбуоти Сариораи геологияи назди ҳукумати Тоҷикистон, дар маросими супоридани компютерҳо сафири Олмон дар Тоҷикистон ҷаноби Холгер Грен низ ҳузур доштааст.
Гуфта мешавад, кумаки мазкур дар доираи амалисозии лоиҳаи «Захираҳои табиӣ барои рушди Тоҷикистон», ки дар асоси Ёддошти тафоҳум бо Институти федералии илмҳои геологӣ ва захираҳои табиии Олмон (BGR)13 декабри соли 2011 ба имзо расида буд, сурат гирифтааст.
Зимнан зикр мегардад, ки дар доираи лоиҳаи зикршуда инчунин ба омӯзиш фаро гирифтани мутахассисон дар назар буда, дарсҳои омӯзиширо мутахассисони баландихтиссоси Институти федералии илмҳои геологӣ ва захираҳои табиии Ҷумҳурии Федеративии Олмон мегузаронанд.
