Аз 14 то 22 сентябр дар шаҳри Алмаато шашумин Барномаи пешсафии ҷавонони Осиёи Марказӣ, пешсафӣ дар ҳифзи муҳити зист барои рушди устувор баргузор хоҳад шуд. Дар барномаи мазкур мутахассисони аз Казоқистон, Қирғизистон, Узбакистон, Тоҷикистон, Туркманистон ва Афғонистон иштирок мекунанд.
Дар ин Барнома ҳайати Тоҷикистонро Маҳмадалӣ Қурбонов, номзади илмҳои иқтисод, директори коллеҷи технологии шаҳри Душанбе муаррифӣ намуда, дар мавзӯи “Равиши нав ба иқтисоди сабз дар доираи рушди устувор” маърӯза хоҳад кард. Инчунин дар ин Барнома 5 нафар мутахассисони дигар аз Тоҷикистон иштирок мекунанд.
Чорабиниро маркази экологии минтақавии Осиёи марказӣ дар ҳамкори бо UNEP, бо кумаки Ҳукумати Норвегия ва маркази САҲА дар Остона ташкил намудааст.
Дар Барномаи мазкур ба масъалаҳои ба рушди устувор дар Осиёи Марказӣ расидан, гузариши кишварҳо ба иқтисоди “сабз”, сарфакорона истифода бурдани захираҳои обӣ, дастраси ба оби нушокӣ, баробарии гендерӣ, истифодаи босамари барқ ва рушди устувори энергетикӣ таваҷҷуҳ зоҳир хоҳад шуд.
Қобили зикр аст, ки ин Барнома барои баҳодиҳии маҷмӯӣ дар масъалаи рушди устувор дар доираи таҳдидҳои ҷаҳонӣ, инчунин истеъмол ва аввалиятҳои Осиёи Марказӣ нигаронида шудааст.