Ширкатҳои фароҳамсози Интернети Тоҷикистон дастрасӣ ба видеохостинги YouТube ва шабакаҳои иҷтимоии Facebook ва Odnoklassniki-ро барқарор намуданд. Барои корбарони тоҷикистонӣ айни замон дастрасӣ ба ин шабакаҳои иҷтимоӣ бидуни монеъа аст.
Аммо дастрасӣ ба сомонаи Радиои Озодӣ то ҳол маҳдуд аст. Дастрасӣ ба сомонаҳои мазкур ва торнамои Радиои Озодӣ ахири моҳи августи соли равон бо дастури Хадамоти алоқаи назди ҳукумати Тоҷикистон қатъ гардида буд. Сабабҳои ин амал шарҳу тавзеҳ дода нашуда буданд.
Торнамои Радиои Озодӣ бо истинод ба манбаъҳои худ дар ин робита иттилоъ дода буд, ки 25 август ба ширкатҳои фароҳамсози Интернет дар бораи маҳдуд кардани дастрасӣ ба чанде аз сомонахо дастури расмии хаттӣ ирсол шудааст.
Дар ҳамин ҳол, роҳбари Ассотсиатсияи ширкатҳои фароҳамсози Интернети Тоҷикистон Асомиддин Атоев зимни суханронӣ дар машварати САҲА дар Варшава оид ба иҷрои уҳдадориҳо доир ба ченаки инсонӣ аз ҳукумат
даъват кард
, ки ба шаҳрвандони ҷумҳурӣ дастрасии озодона ба Интернет ва дигар сарчашмаҳои муоири иттилоот таъмин карда шавад.
Дар суханронии худ А.Атоев таваҷҷуҳи иштирокдорони чорабиниро ба маҳдудиятҳои аз ҷониби мақомоти ҳукумат суратгирифта ба дастрасӣ ба Интернет ҷалб кард.
Ӯ қайд кард, ки тайи ду моҳи ахир дар қаламрави ҷумҳурӣ дастрасӣ ба видеохостинги YouТube ва шабакаи иҷтимоии Facebook маҳдуд гардида, ахири моҳи август барои корбарони тоҷикистонӣ шабакаи Odnoklassniki ва торнамои Радиои Озодӣ дастнорас шуданд.
Атоев таъкид доштааст, ки «ин маҳдудиятҳои нофаҳмову ғайриқонунии дастрасӣ ба Интернет дар Тоҷикистон то ҳол идома доранд».
Ба андешаи ӯ, чунин амалҳо натанҳо ҳуқуқи шаҳрвандони Тоҷикистонро поймол мекунанд, балки манфиатҳои иқтисодии кишварро низ нодида мегиранд.
Атоев хотиррасон намудааст, ки мувофиқи уҳдадориҳо назди Созмони ҷаҳонии тиҷорат, Тоҷикистон бояд танзимгари мустақили телекоммуникатсионӣ таъсис бидиҳад. «Мутаассифона, танзимгари амалкунандаи ватанӣ ҳама гуна масъулият оид ба қатъи дастрасӣ ба сомонаҳоро инкор мекунад», – иброз доштааст ӯ.
