Дар доираи як аксияи идораи Сабти асноди ҳолатҳои шаҳрвандӣ дар минтақаи ҷануби ҷумҳурӣ ва ба муносибати Соли оила назди Хонаи ақди никоҳи «Хушбахтӣ»-и шаҳри Кӯлоб муҷассамаи оила ифтитоҳ гардид.
Аз шаҳрдории Кӯлоб ба «Азия-Плюс» дар ин робита иттилоъ доданд, ки ҳамин рӯз дар шаҳр маросими хайрияи тӯйи арӯсии ду ҷуфти навхонадорон ва хатнатӯйи 10 нафар кӯдакон аз оилаҳои камбизоат гузаронида шуданд.
Ба гуфтаи манбаъ, чунин аксияҳо имрӯзҳо ҳамчунин дар шаҳри Норак, ноҳияҳои Муъминободу Восеъ низ ҷараён дошта, чанде қабл дар ноҳияи Данғара ба хотири пешгирии пайвастани ҷавонон ба сафҳои созмонҳои ифротгаро дар мавзӯи нақши оила дар таълиму тарбияи фарзанд семинари ҷумҳуриявӣ доир гардид.
Тибқи маълумоти дастандаркорони ин чорабинӣ, дар аксияи мазкур ҳудуди 80 нафар кормандони хадамоти Сабти асноди ҳолатҳои шаҳрвандӣ аз вилоятҳои Суғду Хатлон ва Вилояти Мухтори Кӯҳистони Бадахшон иштирок доранд.
