Нерӯҳои махсуси Афғонистон субҳи имрӯз шаҳри Қундузро аз тасарруфти ҷангиёни ҳаракати «Толибон» озод карданд. Дар ин бора
АМИТ «Ховар»
бо истинод ба ВКД Афғонистон иттилоъ медиҳад.
«Шаҳр озод шуда, амалиёти поксозӣ аз террористон идома дорад. Душман талафоти зиёд дид»,-изҳор доштааст намояндаи ВКД Сиддиқ Сиддиқӣ.
Саидсарвар Ҳусайнӣ, сухангӯи пулиси Қундуз дар як тамоси кӯтоҳи телефонӣ бо
Радиои Озодӣ
ин хабарро тасдиқ карда ва гуфтааст, ҳоло даргириҳои ҷудогона дар канораҳои шаҳр идома дорад, аммо ба сурати умум маконҳои муҳими ин шаҳр аз гурӯҳи Толибон озод шудааст.
Қобили зикр аст, ки рӯзи 28 сентябр ҷангиёни ҳаракати Толибон маркази маъмурии вилояти Қундуз-шаҳри Қундузро таҳти назорат гирифта, рӯзи 29 сентябр нерӯҳои давлати Афғонистон амалиёти озодкунии шаҳр аз тасрруфи толибонро оғоз намуданд.
