Сафири Тоҷикистон дар Эрон Неъматулло Эмомзода кишварҳои узви Созмони ҳамкории иқтисодӣ (СҲИ)-ро ба густариши ҳамкориҳои мутақобилаи минтақавӣ дар бахшҳои гуногун даъват намуд.
Аз хадамоти матбуоти намояндагии дипломатии Тоҷикистон дар Эрон ба «Азия-Плюс» дар ин робита иттилоъ доданд, ки зимни суханронӣ дар ҷаласаи навбатии СҲИ дар Теҳрон Эмомзода зарурати тавсеъаи ҳамкориҳои кишварҳои узви Созмон дар бахшҳои нақлиёту коммуникатсия, иқтисод ва савдо, сармоягузорӣ ва бахши кишоварзиро таъкид доштааст.
Зимнан зикр гардид, ки дар кори ҷаласаи мазкур намояндагони ҳамаи 10 кишвари узви Созмон, аз ҷумла Тоҷикистон иштирок доранд ва ин чорабинии панҷрӯза дар Теҳрон то 17 декабр идома меёбад.
Созмони ҳамкории иқтисодӣ – ташкилоти байнидавлатии иқтисодии минтақавӣ ба шумор рафта, онро соли 1985 Эрону Покистон ва Туркия бо мақсади пешбурди ҳамкориҳои иқтисодӣ, техникӣ ва фарҳангӣ миёни кишварҳои узви Сомзон таъсис доданд.
Соли 1992 боз 7 кишвар – Афғонистон, Озарбойҷон, Қазоқистон, Қирғизистон, Тоҷикистон, Туркманистон ва Ӯзбекистон ба сафи ин Созмон пайвастанд. Котибот ва шуъбаи фарҳанги Созмони ҳамкории иқтисодӣ дар Теҳрон, дафтари иқтисоди он дар Туркия ва дафтари илмии он дар Покистон воқеъ аст.
