Русия ба сохтмони Лоиҳаи минтақавии интиқол ва савдои нерӯи барқ дар Осиёи Марказӣ ва Ҷанубӣ (CASA-1000) сармоягузор шуда метавонад.
Директори Фонди рушди энергетикӣ Сергей Пикин ба ВАО-и Русия дар ин робита
иттилоъ додааст
, ки айни замон лоиҳаҳои марбут ба тақвияти робитаҳо миёни кишварҳои минтақаи Осиёи Марказӣ мавриди баррасӣ қарор доранд.
«Ин ҷо Русия аз як тараф метавонад сармоягузори лоиҳаи CASA-100 бошад ва аз ҷониби дигар Русия дар Тоҷикистон иншооти зарурии интиқол дорад, ки ба Афғонистон нерӯи барқ интиқол дода метавонад», – иброз доштааст Пикин.
Ӯ таъкид доштааст, ки замоне Русия ба сохтмони нерӯгоҳи барқи обии «Сангтӯда-1» маблағгузорӣ намуд, «вале дар амал Тоҷикистон меъёри зарурии худкифо будани онро таъмин карда натавонист ва лоиҳаи CASA-1000 метавонад ҳаҷми лозимаи содироти нерӯи барқро таъмин кунад, то ки ин нерӯгоҳ дар ниҳояти кор даромаднок шавад».
Ба гуфтаи ӯ, бинобар сабаби чанин маротиба аз ҷониби ҷангиён хароб шудани хатҳои интиқоли барқ, айни замон Афғонистон ба таъмини бехатарии чунин иншоот қодир набуда, бо ин сабаб сармоягузорӣ бештар бо хатари нобудшавӣ марбутанд. «Нерӯҳои эътилофи байнулмилалӣ он ҷо кам мешаванд ва нерӯҳоӣ дохилӣ алҳол аз уҳдаи иҷрои чунин кор набаромада истодаанд», – қайд кардааст С.Пикин.
Номбурда ҳачунин зикр кардааст, ки сохтмони нерӯгоҳҳои барқи обӣ дар қаламрави худи Афғонистон низ ба ҳамин мушкилот вобаста аст. «Замоне бунёди нерӯгоҳи барқи обии Даштиҷум тарҳрезӣ шуда, бо сабаби мушкилоти сиёсӣ ин иқдом амалӣ нагардид ва мушкилоти асосӣ чун пешина ба таъмини бехатарии сохтмон вобаста аст», – қайд кардааст дар шарҳи ин масъала С.Пикин.
Қобили зикр аст, ки қаблан сарони кишварҳои иштирокчии CASA-1000
изҳор доштанд
, ки дар маросими гузоштани хишти аввал ба сохтмони хатти интиқоли барқ ва дигар зербинои ин лоиҳа дар Душанбе иштирок карданианд.
Амалисозии лоиҳа ба интиқоли нерӯи барқ ба Афғонистону Покистон дар ҳаҷми 1300 МВт дар сол аз ҷониби Тоҷикистону Қирғизистон имкон медиҳад. Дар лоиҳаи CASA-1000 сохтмони хатти интиқоли барқи минтақавӣ барои дар мавсими тобистон аз Тоҷикистону Қирғизистон ба Афғонистону Покистон интиқол додани нерӯи барқи зиёдатӣ пешбинӣ шудааст. Ҳамчунин амалисозии ин лоиҳа ба таҳияи механизмҳои савдои барқ ва таъсиси бозори минтақавии нерӯи барқ дар Осиёи Марказӣ ва Ҷанубӣ (CASAREM) низ мусоидат менамояд.
Оғози корҳои бевоситаи амалисозии лоиҳаи CASA-1000 моҳи майи соли ҷорӣ дар назар аст. Ба ҷудо кардани воситаҳо барои сохтмони қитъаи тоҷикистонии лоиҳаи мазкур Бонки ҷаҳонӣ, Бонки исломии рушд, Бонки аврупоии таҷдиду рушд, Агентии ИМА оид ба рушди байнулмилалӣ ва ҳукумати Британияи Кабир розӣ шуданд.
