Дар толори Академияи илмҳои Ҷумҳурии Тоҷикистон Олимпиадаи ҷумҳуриявии донишҷӯёни муассисаҳои таҳсилоти олии Ҷумҳурии Тоҷикистон дар соҳаҳои илм барои дарёфти ҷоизаи «Ҷоми Академияи илмҳои Ҷумҳурии Тоҷикистон» ҷамъбаст карда шуд.
Тавре Шервони Умриддин, котиби матбуотии Академияи илмҳои Ҷумҳурии Тоҷикистон хабар дод, Олимпиадаи мазкур бо ташаббуси президенти Академияи илмҳои Ҷумҳурии Тоҷикистон, академик Фарҳод Раҳимӣ дар АИ ҶТ соли сеюмаст, ки доир карда мешавад.
Олимпиада аз рӯи 12 самти илмӣ, аз ҷумла математика, физика, химия, астрономия, геология, биология, иқтисодиёт, технологияҳои иттилоотӣ, забон ва адабиёти тоҷик, таърих, фалсафа ва ҳуқуқ баргузор гардид, ки дар он 33 муассисаҳои таҳсилоти олии Ҷумҳурии Тоҷикистон ва беш аз 300 нафар донишҷӯён қувваозмоӣ намуданд.
Аз рӯи ҷамъбасти Олимпиада 9 нафар донишҷӯёни Донишгоҳи миллии Тоҷикистон, 1 нафар донишҷӯи Донишгоҳи давлатии омӯзгории Тоҷикистон ба номи С. Айнӣ, 1 нафар донишҷӯи Донишгоҳи давлатии Хуҷанд ба номи академик Б. Ғафуров ва 1 нафар донишҷӯи Донишгоҳи давлатии Қурғонтеппа ба номи Н. Хусрав ҷои якумро ишғол намуда, бо дипломҳои дараҷаи якуми Олимпиада ва «Ҷоми Академияи илмҳои Ҷумҳурии Тоҷикистон» сарфароз гардонида шуданд.
Бо дипломҳои ҷои дуюми Олимпиада 4 нафар донишҷӯёни Донишгоҳи давлатии Хуҷанд ба номи академик Б. Ғафуров, 2 нафар донишҷӯёни Донишкадаи давлатии кӯҳию металлургии Тоҷикистон, 1 нафар донишҷӯи Донишгоҳи давлатии ҳуқуқ, тиҷорат ва сиёсати Тоҷикистон, 1 нафар донишҷӯи Донишкадаи политехникии Донишгоҳи техникии Тоҷикистон ба номи М. Осимӣ дар шаҳри Хуҷанд, 1 нафар донишҷӯи Донишгоҳи давлатии Қурғонтеппа ба номи Н. Хусрав, 1 нафар донишҷӯи Донишгоҳи давлатии омӯзгории Тоҷикистон ба номи С. Айнӣ, 1 нафар донишҷӯи Донишгоҳи славянии Россия-Тоҷикистон ва 1 нафар донишҷӯи Филиали Донишгоҳи давлатии Масква ба номи М. Ламоносов дар шаҳри Душанбе сазовор гардиданд.
Дар Олимпиада 3 нафар донишҷӯёни Филиали Донишгоҳи давлатии Масква ба номи М. Ламоносов дар шаҳри Душанбе, 2 нафар донишҷӯёни Донишгоҳи миллии Тоҷикистон, 2 нафар донишҷӯёни Донишкадаи молия ва иқтисоди Тоҷикистон, 2 нафар донишҷӯёни Донишгоҳи давлатии Қӯрғонтеппа ба номи Н. Хусрав, 1 нафар донишҷӯи Донишгоҳи давлатии Хуҷанд ба номи академик Б. Ғафуров, 1 нафар донишҷӯи Донишгоҳи давлатии ҳуқуқ, тиҷорат ва сиёсати Тоҷикистон, 1 нафар донишҷӯи Донишгоҳи давлатии омӯзгории Тоҷикистон ба номи С. Айнӣ, 1 нафар донишҷӯи Донишгоҳи аграрии Тоҷикистон ба номи Ш. Шоҳтемур, 1 нафар донишҷӯи Донишгоҳи давлатии тиҷорати Тоҷикистон, 1 нафар донишҷӯи Донишгоҳи давлатии Кӯлоб ба номи А. Рӯдакӣ, ки ҷои сеюмро ишғол намуда, бо дипломҳои дараҷаи сеюми Олимпиада сарфароз гардонида шуданд.
Сипас, 44 нафар донишҷӯён барои фаъолона иштирок намуданашон дар Олимпиада бо Ифтихорномаҳои Академияи илмҳои Ҷумҳурии Тоҷикистон қадрдонӣ карда шуданд.
Дар охири Олимпиада ба 11 нафар донишҷӯёни муассисаҳои таҳсилоти олии ҷумҳурӣ Ифтихорномаҳои Институти фалсафа, сиёсатшиносӣ ва ҳуқуқи ба номи А. Баҳоваддинови АИ ҶТ ва Институти математикаи АИ ҶТ супорида шуд.
