Президенти Тоҷикистон Эмомалӣ Раҳмон имрӯз ба ноҳияи Ёвон ташриф оварда, дар маросими мавриди баҳрабардорӣ қарор гирифтани се корхонаи саноатӣ иштирок кард. Ин корхонаҳо барои таъмини эҳтиёҷоти “Корхонаи алюминии тоҷик” сохта шудаанд.
Бино ба иттилои хадамоти матбуоти сарвари давлат, дар корхонаи навбунёд ҳамасола 12 ҳазор тонна криолит,18 ҳазор тонна фториди алюминий ва 130 ҳазор тонна кислотаи сулфат истеҳсол мегардад. Ҳамчунин дар корхонаи мазкур ба таври иловагӣ таввасути дастгоҳҳои эҳтиётӣ истеҳсоли криолит дар ҳаҷми 18 ҳазор тонна ва фториди алюминий дар ҳаҷми 27 ҳазор тонна пешбинӣ шудааст.
Гуфта мешавад, 80%-и маҳсулоти дар ин корхона истеҳсолшуда барои қонеъ намудани эҳтиёҷоти “Ширкати алюминии тоҷик” равона гардида, боқмионад ба хориҷи кишвар содирот мешавад. Се коргоҳи бузурги як корхонаи азими саноатӣ, ки дар онҳо истеҳсоли нодиртарин маҳсулоти зарурӣ барои саноати алюминий амалӣ мешавад баробари мавриди баҳрабардорӣ қарор гирифтан ҷойи кории доимӣ барои зиёда аз 800 нафар гардида дар ғанӣ гардонидани буҷети давлат ва афзун намудани қудрати содиротии мамлакат нақши бузург мегузорад.
Барои фаъолияти муназзами ин корхонаи азим ангиштсанг истифода мегардад, ки истихроҷ ва дастрас кардани он аз Кони ангишти Фон-Яғноби ноҳияи Айнӣ аз ҷониби Ширкати Талко-Ресурс анҷом дода мешавад.
Баъди ифтитоҳи корхонаҳои истеҳсоли криолит, алюминии фтордор, содаи каустикӣ ва кислотаи сулфат дар Корпоратсияи кимиёвии металлургии тоҷик “Талко кимиё” Эмомалӣ Раҳмон бо фаъолони ноҳия ва коргарону мутахассисони ин корхонаи калони саноатии мамлакат суҳбати самимӣ доир намуд.
