Барои сар задани муноқиша дар бозии футбол миёни дастаҳои Тоҷикистону Ӯзбекистон диаспораҳои миллии Тоҷикистон, Ӯзбекистон, Қирғизистон ва Озарбойҷон аз сокинони шаҳри Братски вилояти Иркустк маъзарат хостанд.
Бино ба маълумоти хадамоти матбуоти маъмурияти шаҳри Братск, дар номаи диаспораҳои миллӣ қайд шудааст, ки «қисмате аз мухлисон ба эҳсосот дода шуда, талоши ба майдон баромаданро карданд ва ин амал ба сар задани муноқиша боис гардид».
«Самимона умедворем, ки ин ҳодиса муносибатҳои шаҳрдорӣ бо диапораҳоро халалдор намесозад. Аз ҷониби худ мо ҳамаҷониба талош меварзем, ки дигар чунин ҳодисаҳо такрор нашаванд ва муноқишаи дар варзишгоҳи «Металлург» рухдода идома наёбад», – таъкид шудааст дар нома.
Ёдрас мекунем, ки дар бозии футбол миёни дастаҳои Тоҷикистону Ӯзбекистон, ки рӯзи 11 сентябр дар шаҳри Братски вилояти Иркутски Русия доир гардид, байни мухлисон муноқишаву занозанӣ сар зад.
Дар навбати худ, Федератсияи футболи Тоҷикистон дар робита ба маълумот доир ба муноқиша дар бозии футбол миёни дастаҳои Тоҷикистону Ӯзбекистон дар мусобиқаи байнулмилалӣ дар Братск изҳороти расмӣ пахш намуд.
