Дар ҳисоботи ширкати аудити Baker Tilly Klitou and Partners SRL, ки дар сомонаи ШСХК “Барқи тоҷик” интишор шудааст, зикр мегардад, ки агар ширкат аз ҷониби саҳҳоми худ дастгирӣ наёбад, ба идомаи фаъолият қодир нест.
Ягона саҳмиядори ширкати “Барқи тоҷик” ҳукумати Тоҷикистон мебошад, ки молики бастаи назоратии саҳмияҳои ширкат аст.
Дар ҳисобот қайд мешавад, ки соли 2015-ро ширкат ба маблағи беш аз 2,8 млрд. сомонӣ зиёни молӣ ҷамъбаст намуда, дар сурати қодир набудани он ба идомаи фаъолият, амалиёти тасҳеҳӣ бояд тавре сурат гиранд, ки арзиши дороиҳо то арзиши ҷубронпазири онҳо оварда шаванд, то ки ҳама гуна уҳдадориҳои минбаъдаи пайдошуда оид ба дороиҳои дарозмуҳлат ва уҳдадориҳо ба сифати дороиҳои кӯтоҳмуҳлат ва уҳдадориҳои ҷорӣ баргардонида шаванд.
Гуфта мешавад, аудиторҳо аз саҳҳоми асосӣ нома гирифтаанд, ки дар он идомаи дастгирии молиявии ширкат аз ҷониби он тасдиқ мешавад.
Ҳамчунин дар ҳисобот зикр мегардад, ки раҳбарияти ширкат “тартиботи зарурии марбут ба эътирофи даромадҳо, қарзи дебиторӣ ва пешпардохтҳои гирифта барои нерӯи барқро роҳандозӣ накардааст”.
“Аз ин рӯ, мо ба мукаммалӣ ва дурустии эътирофи даромадҳо, қарзи дебиторӣ ва пешпардохтҳои гирифта барои нерӯи барқро дар ҳисоботи молиявии муттаҳидшуда баҳогузорӣ карда натавонистем”, – изҳор кардаанд аудиторон.
Дар ҳамин ҳол, бино ба маълумоти ширкати “Барқи тоҷик”, охири нимсолаи аввал қарзи ширкат қариб ба 12 млрд. сомонӣ расида, 10 млрд.-и он – қарз ба Вазорати молия аз ҳисоби сармояҳои ҷалбшуда барои амалисозии лоиҳаҳои гидроэнергетикӣ мебошад.
Ҳаҷми умумии қарзҳои кӯтоҳмуҳлати ширкат ҳудуди 2 млрд. сомониро ташкил медиҳад. Аз ҷумла ширкат ба нерӯгоҳи Сангтӯда-1 – 627,2 млн. сомонӣ ва нерӯгоҳи Сангтӯда-2 – наздики 410 млн. сомонӣ қарздор аст.
Ба охири моҳи июни соли равон қарзи дебиторӣ ба ширкати “Барқи тоҷик” каме бештар аз 1,5 млрд. сомониро ташкил медиҳад. Аз ҷумла қарзи аҳолӣ ба – 621,7 млн. сомонӣ, КВД “ТАЛКО” – ба 468 млн. сомонӣ, пойгоҳҳои обкашӣ – ба 67 млн. сомонӣ ва хоҷагиҳои деҳқонӣ – ба 97 млн. сомонӣ баробар шудааст.
