Айбдоркунандаи давлатӣ аз суд дархост намуд, ки Бузургмеҳр Ёров, адвокати фаъолони ҳабсшудаи Ҳизби фаъолияташ манъшудаи наҳзати исломии Тоҷикистон ба 25 соли зиндон маҳкум карда шавад.
Прокурор Рустам Тақдирзода аз суд дархост намуд, ки Бузургмеҳр Ёров мутобиқи 5 моддаи Кодекси ҷиноии ҶТ – 189 (Барангехтани кинаю адовати миллӣ, нажодӣ, маҳалгароӣ ва ё динӣ); 247 (Қаллобӣ); 307 (Даъвати оммавӣ барои бо роҳи зӯроварӣ тағйир додани сохти конститутсионии ҶТ); 307, замиман 1 (Даъвати оммавӣ дар ба амал баровардани фаъолияти экстремистӣ (ифротгароӣ) ва 340 (Сохтакорона тайёр кардан, ба муомилот баровардани маркаҳои боҷи аксизӣ, маркаҳои махсус ё аломатҳои мутобиқат ва ё истифодаи онҳо) гунаҳкор эътироф карда шавад.
Нисбати адвокат Нуриддин Маҳкамов айбдоркунандаи давлатӣ аз суд дархост кард, ки ӯ мутобиқи 4 модда – 189 (Барангехтани кинаю адовати миллӣ, нажодӣ, маҳалгароӣ ва ё динӣ); 247 (Қаллобӣ); 307 (Даъвати оммавӣ барои бо роҳи зӯроварӣ тағйир додани сохти конститутсионии ҶТ); 307, замиман 1 (Даъвати оммавӣ дар ба амал баровардани фаъолияти экстремистӣ (ифротгароӣ) гунаҳкор дониста шуда, ба 23 соли зиндон маҳкум карда шавад.
Дар ҳамин ҳол, бино ба иттилои Радиои Озодӣ, айбдоркунандаи давлатӣ зимни талаби ҷазо барои Бузургмеҳр Ёров аз додгоҳ ҳамчунин хостааст, ки чанд дороии ӯ – як дукони тиҷоратӣ дар маҳаллаи Маяковский, як манзили нимсохт дар Чимтеппа ва як худрави сабукрави тамғаи "Ҳюндай"-ро, ки ба номи ӯ будааст, мусодира ва давлатӣ кунад.
Хабаргузории TojNews дар ин робита менаисад, Муаззама Қодирова, вакили дифои Ёров ва Маҳкамов ба даъвои айбдоркунандаи давлатӣ изҳори норозиятӣ карда аз судя хостааст, ки ҳангоми баровардани ҳукм адл кунанд.
