Ин садамаи нохуш, ки бар асари он Мижгона Бӯтаева осеб дид, ҳанӯз 16 август дар Душанбе рух дода, ба он корманди сафорати Олмон дар Тоҷикистон гунаҳкор номида шуд. Айни замон духтари 14-сола ба ҷарроҳии таъҷилӣ ниёз дорад, вале оилаи онҳо барои ин маблағ надоранд. Дар намояндагии дипломатии Олмон мегӯянд, ки корманди онҳо гунаҳкор нест.
Дар садамаи нақлиёти мазкур, ки назди боғи ҳайвоноти пойтахт ба вуқӯъ пайваст, ду нафар духтарони наврас аз ноҳияи Ҷайҳун (собиқ Қумсангир) бар асари зери чархи автомашинаи корманди сафорати Олмон мондан осеб дида, баъди бистарӣ шудан дар бемористон, Мижгона ба хонаашон рухсатӣ шудаааст, вале баъдан вазъи солимии ӯ бад мешавад.
Яке аз наздикони Мижгона Бегҷон Бӯтаев ба «Азия-Плюс» изҳор намуд, ки барои ҷарроҳии таъҷилии ӯ дар як дармонгоҳи Ҳиндустон 8 ҳазор доллари ИМА маблағ зарур аст. «Намояндагони Вазорати корҳои хориҷӣ ҳамеша Мижгонаро аёдат карда, ваъда медиҳанд, ки сафорати Олмон барои ҷарроҳии ӯ маблағ медиҳад, вале то ҳол ин маблағ ба дасти мо нарасидааст», – иброз дошт ӯ.
Дар сафорати Олмон ба «Азия-Плюс» дар ин робита иттилоъ доданд, ки ҷабрдидагон зери чархи таксии мусофирбар монда, яке аз духтарон, ки камтар осеб дидааст, аз зарба зери чархи автомашинаи сафорат меафтад.
«Ин ҷо пурра масъулиятро ба дӯш гирифтан душвор аст, вале аз лиҳози инсонӣ мо ин масъаларо ҳал карданием ва бо ВКХ ва ширкати суғуртавӣ ҷиҳати ҷудо кардани маблағ барои ҷарроҳии Мижгона гуфтушунид дорем», – гуфтанд дар сафорат.
Дар ВКД Тоҷикистон дар мавриди ин ҳодиса изҳор намуданд, ки ҷабрдидагону шоҳидон дар ин хусус баёнот дода, он вақт автомашинаро на корманди қатории сафорат, балки корманде идора мекардааст, ки мақоми дипломатӣ дорад ва аз ин рӯ, ӯ ба ҷавобгарӣ кашида нашудааст.
