КВД «Алюминийи Тоҷик» (ТАЛКО) тасмим гирифтааст, бо назардошти ба андозаи назаррас паст рафтани нархи ҷаҳонии алюминий масъалаи коҳиш додани ҳаҷми истеҳсолоти ин маҳсулотро дар кишвар ба миён гузорад.
Сомонаи нашрияи «Фараж» дар ин робита менависад, Игор Сатторов, сардори Департаменти иттилоот ва робита бо ҷомеаи КВД «Ширкати Алюминийи Тоҷик» зимни як вохӯрӣ бо рӯзноманигорни расонаҳои дохил ва хориҷи кишвар иттило дода, гуфт «ТАЛКО то анҷоми соли 2016 тасмим дорад, истеҳсоли алюминийи аввалияро ба андозаи тақрибан 5,3 дарсад коҳиш дода, ба ҷойи 158 ҳазор тоннаи қаблан пешбинишуда 150 ҳазор маҳсулот истеҳсол намояд.
-Дар шароити ба миёномадаи иқтисодӣ, ба хотири нигоҳ доштани истеҳсолот ва барои ҷалби инвесторҳо, ба корхонаи истеҳсоти алюминийи тоҷик на танҳо коҳиш додани хароҷот, балки муваққатан паст кардани истеҳсоти маҳсулот зарур аст. Тадбирҳои зиддибуҳронӣ ва кам кардани хароҷотҳои истеҳсолот дар корхона тӯли чанд сол роҳандозӣ мегарданд. Дар ин бобат буҳрон-менеҷменти ширкат чунин меҳисобад, ки яке аз тадбирҳои муассир муваққатан боздоштани кори электролизёрҳо мебошад. То санаи 23-юми сентябр соли 2016 миқдори электролизёрҳо амалкунанда 303 ададро ташкил дод. 60 адад электролизёри дигар омодаи корандозӣ мебошанд. Вале фаъол кардани онҳо дар шароити мураккаби ба миёномадаи феълӣ арзиши маҳсулотро хеле боло бурда, дар натиҷа боиси афзоиши зарар ба ширкат шуда метавонад,- гуфт Игор Сатторов.
Ба гуфтаи номбурда дар соли 2013 зарари ба ширкати «ТАЛКО» воридшуда 28,3 миллион ва соли 2014 бошад, 41 миллион долларро ташкил медод. Вале дар соли баъдӣ он қариб ду маротиба коҳиш дода шуд, ки ба 22,8 миллион доллар баробар карда шуд. Ба шароити вазнини иқтисодӣ нигоҳ накарда, дар нимсолаи аввали соли равон аз фурӯши захираи маҳсулот имкони то 3,2 миллион доллар кам кардани зиёни ширкат ба даст омад, ки нисбат ба зарари ҳамин давраи соли 2015 16,3 миллион ё ба андозаи 80,4% коҳиш ёфтааст.
Дар охири суҳбаташ Игор Сатторов, Сардори Департаменти иттилоот ва робита бо ҷомеаи КВД «Ширкати Алюминийи Тоҷик» хулоса намуд, зимни баррасӣ ва таҳлили омилҳои берунӣ ва дохилӣ, ки ба соҳаи алюминийи миллӣ таъсири манфӣ мерасонад, менеҷменти идораи буҳрони ширкат пешбинӣ менамояд, «афзоиши минбаъдаи истеҳсоли алюминий боиси аз 30 миллион доллар ҳам боло рафтани зиёноти «ТАЛКО» шуда метавонад».
