Президенти Тоҷикистон Эмомалӣ Раҳмон рӯзи 14 октябр бо соҳибкорону тоҷирони ватанӣ ва хориҷӣ мулоқот мекунад. Ин вохӯрӣ соли сеюм аст, ки дар доираи ҷашни Рӯзи соҳибкорон доир мегардад.
Бино ба иттилои хадамоти матбуоти Вазорати рушди иқтисод ва савдои ҶТ, рӯзи 14 октябр зимни вохӯрии президент бо соҳибкорону тоҷирон суҳбат ва табодули афкор сурат гирифта, ҳамчунин қадрдонии намояндагони ин бахши иқтисод дар назар аст.
Рӯзи 15 октябр бо иштироки намояндагони воломақоми созмонҳои байнулмилалии молӣ дар доираи Рӯзи соҳибкорон таҳти шиори «Соҳибкорӣ – муҳаррики иқтисод» Форуми иқтисодӣ ва сармоягузории «Душанбе-2016» баргузор мешавад.
Дар ин форум баррасии масъалаҳои иқтисодӣ, аз ҷумла дар бахшҳои сармоягузорӣ ва соҳибкорӣ, саноат, зербино ва ҳамчунин соҳаҳои моливу бонкӣ дар назар буда, аз соҳибкорон ва сармоягузорон дархост шудааст, ки дар ин хусус бо пешниҳодҳояшон ба вазорат муроҷиат намоянд.
Бино ба маълумоти Кумита, то оғози нимсолаи дуюми соли равон дар Тоҷикистон ҳудуди 284 ҳазор субъектҳои соҳибкорӣ ба қайд гирифта шудааст, ки нисбат ба ҳамин давраи соли гузашта қариб 21,2 ҳазор адад ё худ 8,1% зиёдтар аст.
«Бо мақсади дастгирии молиявии субъектҳои соҳибкорӣ тавассути Муассисаи давлатии «Фонди дастгирии соҳибкории назди ҳукумати Тоҷикистон ба маблағи умумии 109,3 млн. сомонӣ амалисозии 124 лоиҳа дастгирӣ ёфт», – қайд мекунанд дар Кумита.
