Корпоратсияи байнулмилалии молиявӣ (IFC) аз Тоҷикистон даъват кардааст, ки ба лоиҳаи бузурги зерсохтории Digital CASA пайваст шавад.
Роҳбари минтақавии IFC (ба Гурӯҳи Бонки ҷаҳонӣ шомил аст) оид ба телекоммуникатсия Реҷендра Сингх дар ин робита изҳор намудааст, ки кишварҳои минтақа ба баҳрҳо роҳи баромад надоранд, ки ин зимни васл ба шабакаҳои байнулмилалӣ онҳро ба Русия вобаста мекунад ва дар навбати худ ин омил ҳамчунин ба суръати паст ва нархҳои баланд ҳам ба фурӯши интернети яклухт ва ҳам дар сатҳи чакана ба истеъмолгарон боис мегардад.
Сингх таъкид доштааст, ки лоиҳаи Digital CASA минтақаҳои Осиёи Марказӣ ва Ҷанубиро ба ҳам пайваста, иқтидори гузаронандагии шабакаҳои фаромарзии интернетро беҳтар месозад.
«Дар доираи лоиҳа мо бо кишварҳои минтақа ҳамкорӣ дошта, то ҳол барои пайвасташавӣ ба он аз ҳукуматҳои Афғонистону Кирғизистон расман мактуб гирифтем. Ҳукумати Қазоқистон ҳам манфиатдории худро изҳор намуд. Мо аз ҳукумати Тоҷикистон даъват мекунем, ки ба мо пайваст шавад», – гуфт ӯ рӯзи 14 октябр дар Душанбе.
Номбурда ҳамчунин қайд кард, ки дастрасӣ ба интернети босуръат ва васеъхат ба роҳёбии ҳамкории ширкатҳои маҳаллӣ ба иқтисоди ҷаҳон, густариши имконоти тиҷоратии онҳо, афзоиши сармоя ва рақобатпазиӣ дар бозор кумак мекунад.
