Тӯли 10 моҳи соли 2016 ҳаҷми муомилоти моли хориҷии Тоҷикистон беш аз 3,2 млрд. доллари ИМА-ро ташкил дод, ки нисбат ба ҳамин давраи соли 2015 ба андозаи 7,8% ё худ 275 млн. доллари ИМА камтар аст.
Бино ба маълумоти Агентии омори назди президенти ҶТ, коҳиши ҳаҷми муомилоти моли хориҷии Тоҷикистон ба кам шудани ҳаҷми воридоти маҳсулот вобаста аст. Ҳамин тариқ, дар зарфи 10 моҳи соли ҷорӣ ба ҷумҳурӣ ба маблағи ҳудуди 2,5 млрд. доллар маҳсулот ворид карда шудааст, ки нисбат ба ҳамин давраи соли 2015 ба андозаи 10,2% ё худ 283 млн. доллар камтар аст.
Аз ҷумла ҳаҷми воридоти сангҳои қиматбаҳо ва нимақиматбаҳо ва металл (85%), пӯсти коркарднашуда ва чарм (40%), чӯб ва маснӯоти он (39%), маҳсулоти тайёри хӯрокворӣ (26%), маҳсулоти растанӣ (23%) ва маҳсулоти минералӣ (20%) коҳиш ёфтаанд.
Дар ҳамин ҳол, ҳаҷми содироти маҳсулот аз Тоҷикистон ба миқдори 1,1% ё худ ба маблағи 7,7 млн. доллар афзуда, аз оғози сол ба маблағи 744 млн. доллар маҳсулоти Тоҷикистон ба хориҷи кишвар бароварда шудааст. Дар ин давра содироти маҳсулоти тайёри хӯрокворӣ – 75%, маҳсулоти минералӣ – 45%, электроэнергия – 9,5% афзуда, дар ҳамин ҳол ҳаҷми содироти нахи пахта – 8% ва металлҳои арзону маснӯот аз он – 2,8% кам шудааст.
Аз оғози сол Тоҷикистон бо 109 кишвари ҷаҳон муомилоти молӣ анҷом додааст. Шарикони асосии тиҷоратии Тоҷикистон дар ин давра Русия ва Чин маҳсуб ёфта, тайи 10 моҳи соли равон ҳаҷми муомилоти мол миёни Тоҷикистону Русия 868 млн. доллари ИМА ва Тоҷикистону Чин – 760 млн. доллари ИМА-ро ташкил додааст. Тайи 10 моҳи соли 2016 ҳаҷми муомилоти мол бо Қазоқистон ба 520 млн. доллари ИМА баробар шудааст.
