Суди ноҳияи Бобоҷон Ғафурови вилояти Суғд се тан аз сокинони вилоятро барои робита доштан бо созмони ифротгарои фаъолияташ дар Тоҷикистон манъшуда «Ҳизб-ут-таҳрир» ба муҳлатҳои гуногуни зиндон маҳкум кард, ки ду нафари онҳо қаблан низ бо ҳамин иттиҳом муҷозот шуда буданд.
Раиси мурофиаи мазкур судя Зоирзода Боирҷон ба «Азия-Плюс» дар ин робита иттилоъ дод, ки Абдуҷалил Юсуфови 47-сола барои ташкили фаъолияти иттиҳоди ифротгаро ба 8 сол, Насрулло Қодирови 43-сола ва ҳамсоли ӯ Анвар Аббосов барои хабар надодан дар бораи ҷиноят мутаносибан ба 2 сол ва 1,2 соли зиндон маҳкум шудаанд.
Ба гуфтаи судя, Абдуҷалил Юсуфов баъди адои ҷазо барои чунин ҷиноят соли 2009 ба озодӣ баромада, вале баъди раҳоӣ аз зиндон боз ба фаъолияти марбт ба «Ҳизб-ут-таҳрир» машғул шудааст.
«Қодиров низ қаблан муддати 10 сол адои ҷазо намуда, ҳарчанд аз робита доштани Юсуфов бо созмони ифротгаро огаҳӣ дошт, дар ин бора ба мақомоти ҳифзи ҳуқуқ хабар надод», – иброз дошт судя.
Қобили зикр аст, ки соли 2001 фаъолияти созмони «Ҳизб-ут-таҳрир» дар қаламрави Тоҷикистон манъ шуда, соли 2008 ин гурӯҳ ба феҳристи созмонҳои ифротгаро шомил шуд. Фаъолони он мутобиқи қонун ба ҷавобгарӣ кашида мешаванд.
