Вазири корҳои хориҷии Тоҷикистон Сироҷиддин Аслов ба ҳамтои русиягии худ Сергей Лавров номае ирсол намуд, ки дар он ҷониби Тоҷикистон фоҷиаи дар шаҳри Анкара рухдода сахт маҳкум мешавад.
«Қатли сафири Русия дар Туркия Андрей Карлов амали ғайриинсонӣ буда, ба вайрон намудани тамоми меъёр ва қоидаҳои тартиботи ҷаҳони мутамаддин равона карда шудааст», – омадааст дар нома.
Бино ба иттилои Вазорати корҳои хориҷии ҷумҳурӣ, дар нома гуфта мешавад, ки ин амали ваҳшиёна бевосита ба мушкилоти умумиинсонӣ, аз қабили терроризм ва экстремизм вобастагӣ дошта, дар мубориза бар зидди он Тоҷикистон ва Русия мавқеи ягона доранд.
«Ҳамкориҳои ду кишвар дар масъалаҳои мубориза бар зидди чунин ҷолишҳо дар муносибатҳои дуҷониба мақоми афзалиятнок дошта, дар оянда низ ҷиҳати таҳкими талошҳои муштарак дар сатҳи дуҷонибаву бисёрҷониба тамоми чораҳои имконпазир андешида мешаванд», – қайд мешавад дар номаи ВКХ Тоҷикистон
Дар хотима Сироҷиддин Аслов ба аҳли хонавода ва наздикони дипломат, ки то охирин лаҳзаи ҳаёташ дар хизмати халқу кишвараш буд, изҳори ҳамдардии амиқи худро баён намудааст.
Ёдрас мекунем, ки сафири Русия дар Туркия Андрей Карлов ҳангоми суханронӣ дар осорхонае дар Анкара кушта шуд. Президенти Туркия Реджеп Тайип Эрдуғон изҳор дошт, ки барои таҳқиқи ҳодисаи куштори сафири Русия дар Туркия ҷонибҳо гурӯҳи муштараки тафтишотӣ созмон медиҳанд.
