Раҳбарияти Маркази тадқиқоти стратегӣ (МТС)-и назди президенти Тоҷикистон бар ин назар аст, ки барои журналистон дар ҷумҳурӣ ба таврӣ кофӣ шароити озодии баён фароҳам оварда шудааст. Қатъи фаъолияти чанде аз ВАО-ро бошад, дар Марказ ба мушкилоти иқтисодӣ нисбат медиҳанд.
«Тайи 10-15 соли ахир мо шоҳиди он гаштем, ки бисёре аз ВАО дар шароити иқтисоди бозаргонӣ ба рақобат тоб наоварда, баста шуданд. Қатъи фаъолияти ин ВАО, пеш аз ҳама ба муфлисшавӣ марбут буда, ба масъалаҳои озодии баён ҳеҷ рабте надорад», – гуфт директори МТС Худойбердӣ Холиқназар зимни нишасти хабарии имрӯза дар Душанбе.
Ба ақидаи ӯ, озодие, ки барои журналистони тоҷик фароҳам аст, дар аксари кишварҳои Осиёи Марказӣ чунин озодӣ вуҷуд надорад.
Роҳбари Марказ аз журналистон даъват кард, ки зимни таҳияи маводҳои худ каме эҳтиёткор бошанд. Ӯ чунин мешуморад, ки дар шароити ноамнии ҷаҳон «бозиҳои демократия» ба дубора ноамн шудани вазъ дар ҷумҳурӣ оварда расонида метавонанд.
Холиқназар мутмаин аст, ки гуногунандешии аз ҷониби кишварҳои абарқудрат ба давлатҳои Шарқи Наздик таҳмилшуда ба оқибатҳои ногувор боис гардид.
«Мо таҷрибаи талхи ҷанги шаҳрвандиро аз сар гузаронидем ва бо ҳар роҳу восита бояд аз сулҳу ризоят миёни тоҷикон ҳимоя намоем, на балки дар ҷомеа тафриқа андозем», – афзуд ӯ.
Ба ақидаи муовини аввали роҳбари МТС Сайфулло Сафаров, озодии баёни беҳад зиёд дар ҷомеаҳои ноустувор ба давлат зарар расонида метавонад.
«Дар кишварҳои рушдёфта озодии баён ҳар қадаре зиёд бошад, ҳамон қадр хубтар аст. Дар ин кишварҳо озодии баён омили суботу сулҳ ва фаъолшавии шаҳрвандон аст, аммо барои кишварҳое, ки дар ҳоли гузариш қарор доранд, сатҳи баланди озодии баён зиёновар аст», – мегӯяд Сафаров.
Қобили зикр аст, ки тайи соли ахир дар Тоҷикистон чор ВАО – газетаҳои «Вечерний Душанбе», «Дам», «Нигоҳ» ва агентии «ТоҷНюс» аз фаъолият бозмонданд. Боз чанде аз ВАО дар ҳоли басташавӣ қарор дошта, беш аз 10 нафар журналистон Тоҷикистонро тарк карданд.
