Бонки осиёгии рушд (БОР) давоми се соли наздик ба Тоҷикистон дар ҳаҷми 319 млн. доллар кумак мекунад.
Барномаи навшудаи БОР дар Тоҷикистон барои солҳои 2017-2019 ба дастгирии рушди энергетика ва роҳҳо, беҳбуди таъмини амнияти ғизойӣ, беҳтар гардонидани шароити муҳити сармоягузорӣ ва зербинои устувори шаҳрҳо нигаронида шудааст.
Тавре ба «Азия-Плюс» аз намояндагии БОР дар Тоҷикистон иттилоъ доданд, кумаки молӣ дар доираи тарҳи тиҷоратӣ ҳудуди 319 млн. долларро ташкил медиҳад, ки аз тарҳи тиҷоратӣ барои солҳои 2014-2016 ба миқдори 200 млн. доллар зиёдтар аст.
«Тарҳи тиҷоратии мазкур ба стратегия нави шарикӣ бо кишвар дар давраи солҳои 2016-2020 мутобиқ буда, ба дастгирии рушди устувор ва ҳамагонии камтар осебпазир ба хатарҳои беруна, муҳайё кардани ҷойҳои корӣ бо маоши шоиста равона гардида, БОР ба дастгирии ислоҳоти сохторӣ, иштироки бахши хусусӣ дар баланд бардоштани малакаҳо ва сармоягузорӣ ба зербино тавсеъа мебахшад», – иброз дошт зимни вохӯрӣ бо журналистон намояндаи доимии БОР дар Тоҷикистон Си.Си.Ю.
Тибқи тарҳи индикативӣ, ҳаҷми кумаки БОР ба Тоҷикистон дар соли 2017 – 107 млн. ва сармоягузориҳои тарҳрезишуда дар соли 2018 – 108 млн. ва дар соли 2019 – 104 млн. доллари ИМА пешбинӣ шудааст, вале ҳаҷми маблағҳои ниҳоии дастгириву кумак ба дастовардҳо дар ҷумҳурӣ ва мавҷуд будани воситаҳо дар БОР вобаста хоҳанд буд.
Дар назар аст, ки 50 фоизи ин кумак ба сифати дастгирии грантӣ ва боқимонда дар шакли қарзҳо пешниҳод мешавад.
Тоҷикистон соли 1998 ба узвияти БОР пазируфта шуда, ин ниҳоди байнулмилалии молӣ яке аз ташкилотҳои асосии мададрасон ба ҷумҳурӣ маҳсуб меёбад. То имрӯз ҳаҷми маблағҳои ҷудошудаи ин ниҳод ба Тоҷикистон ба сифати қарзҳои имтиёзнок, грант ва кумакҳои техникӣ беш аз 1,5 млрд. доллари ИМА-ро ташкил медиҳад.
