Раиси Кумитаи андози Тоҷикистон Нусратулло Давлатзода изҳороти бархе аз дипломатҳои хориҷӣ дар бораи баланд будани сарбории андоз дар ҷумҳуриро беасос унвон кард.
Дар робита ба изҳороти сафири Фаронса дар Тоҷикистон Ясмин Гуедар оид ба мушкилоти коррупсия ва андозҳои баланд ӯ зимни нишасти хабарӣ қайд кард, ки сафир мегӯяд, ин масъалаҳоро баррасӣ мекунад, вале мушаххас намекунад, ки маҳз кадом мушкилоти пардохти андозро дар назар дорад.
Қобили зикр аст, ки рӯзи 13 январ Ясмин Гуедар ба рӯзноманигорон изҳор карда буд, ки ширкатҳои фаронсавӣ дар Тоҷикистон ба мушкилот дучор мешаванд ва масъалаи марбут ба ширкати Total-ро ба гунаи мисол овард.
«Вазифаи ман бо ҳукуматдорони тоҷик ошкоро баррасӣ кардани ин масъала аст, аз ҷумла баррасии масъалаи андозбандӣ. Ҳамчунин доир ба коррпусияи мавҷуда сухан гуфтан низ зарур аст. Рисолати ман ҳимояи ширкатҳои фаронсавӣ аст», – иброз дошта буд ӯ.
Раиси Кумитаи андоз дар ин робита зикр кард, ки байни Кумита ва ширкати Total баҳсҳо оид ба андоз вуҷуд доранд, ки аз соли 2013 ҳамроҳ бо Корпоратсияи миллии нафту гази Чин (CNPC) ва ширкати канадагии Tethys дар ҷануби ҷумҳурӣ ба ҷустуҷӯи нафту газ машғуланд.
Давлатзода қайд кард, ки бо роҳбари Total чандин маротиба вохӯрда, мурофиаи баррасии масъала дар суд боздошта шудааст. «Бо дархости мо ширкат ҳуҷҷатҳои иловагиро пешниҳод намуд, ки мутахассисон мавриди омӯзиш қарор додаанд. Баъди ин баррасии масъала дар суд идома меёбад», – изҳор кард номбурда.
«Мушкили асосӣ дар он ифода меёбад, ки ширкатҳои хориҷӣ ҳуҷҷатҳояшонро бо забони тоҷикӣ роҳандозӣ намекунанд, ҳарчанд қонунгузорӣ инро талаб дорад, – гуфт раиси Кумита. – Аққалан ҳуҷҷатҳоро бо забони русӣ омода мекарданд, то ки дар бораи чӣ сухан рафтан дар онҳо маълум шавад».
Дар робита ба изҳороти сафири Русия дар Тоҷикистон Игор Лякин-Фролов доир ба коҳиши ҳаҷми сармоягузориҳо аз Русия бар асари «меъёрҳои баланди андоз, бахусус дар бахши телекомуникатсионӣ», раиси Кумита қайд кард, ки шароиту сарбориҳои пардохти андоз дар ҷумҳурӣ барои ҳама, ҳам ширкатҳои хориҷиву ҳам ширкатҳои ватанӣ якхелаанд.
«Дар бораи даъвоҳо оид ба андоз нисбати ширкатҳои алоқаи мобилии русиягии «Билайн» ва «Мегафон» гуфтаниам, ки агар онҳо мутобиқи қонунгузорӣ кор мекарданд, ба мушкилот дучор намешуданд, – таъкд дошт Давлатзода. – Андозҳоро рӯйпӯш сохта, маълумоти носаҳеҳ пешниҳод мекунанд ва аз ин рӯ, табиист, ки ҷаримабандӣ шуда, баъдан аллакай маблағро бо фоизҳояш пардохт мекунанд».
