Дар пойтахти Тоҷикистон – шаҳри Душанбе маъракаи 150 рӯзи ободонию созандагӣ ва ниҳолшинонию кабудизоркунӣ эълон шуд.
Бино ба маълумоти дафтари матбуоти шаҳрдории Душанбе, ин маърака аз 1 феврал то 27 июн, то рӯзи ҷашни 20-солагии Ваҳдати миллӣ доир мегардад. Раиси нави пойтахт Рустами Эмомалӣ маҳз ба муносибати сазовору арзанда ҷашн гирифтани Рӯзи ваҳдати миллӣ ин қарорро ба имзо расонидааст.
Гуфта мешавад, маъракаи мазкур таҳти унвони «Хуррамгардонии Душанбешаҳр – рисолати сокинони пойтахт!» гузаронида шуда, ба сохторҳои дастгоҳи Раиси шаҳри Душанбе, муассисаҳои мақомоти иҷроияи ҳокимияти давлатӣ, корхонаву ташкилотҳо дастур дода шудааст, ки дар назди майдончаҳои бино, гулгашту боғҳо, кӯчаву хиёбонҳо, биноҳои маъмурию маишӣ корҳои ободониву кабудизоркунӣ ва маъракаи ниҳолшинониро вусъат дода, ҷиҳати амалӣ гардонидани нақшаи чорабиниҳои номбурда чораҷӯӣ намоянд.
Зикр мегардад, ки ба раисони ноҳияҳои шаҳр, КВД таҷрибавии илмию истеҳсолии “Сабзкорӣ”, роҳбарони корхонаю идораҳо, ташкилоту муассисаҳо ва соҳибкорони инфиродии фаъолияткунанда дар ҳудуди шаҳри Душанбе супориш дода шудааст, ки дар мавзеъҳои интихобгардида бо ширкати аҳли ҷамоатчигии шаҳр, бахусус ҷавонон бо риояи талаботи агротехникӣ ва тавсияи мутахассисони соҳа маъракаи ниҳолшинониро ба роҳ монда, нигоҳубини минбаъдаи онҳоро таъмин ва раванди ниҳолшинонию кабудизоркуниро пайваста тақвият бахшанд.
