Президенти Тоҷикистон Эмомалӣ Раҳмон дар иртибот ба амали террористӣ дар ибодатгоҳи шаҳри Сеҳвани музофоти Синди Покистон ба сарвазири ин кишвар Муҳаммад Навоз Шариф барқияи тасаллият ирсол намуд.
Бино ба иттилои хадамоти матбуоти сарвари давлат, дар барқияи Эмомалӣ Раҳмон қайд мешавад, ки «хабари фоҷиабори таркиши маргталабонаи террористӣ дар ибодатгоҳи шаҳри Сеҳвани музофоти Синд, ки муҷиби шаҳодати даҳҳо зоирону мардуми бегуноҳ ва захмӣ шудани зиёда аз 150 нафар шаҳрвандони кишвар гардидааст, моро ниҳоят андӯҳгин намуд».
«Тоҷикистон ин аъмоли ғайриинсонии як иддаи ҷинояткорро, ки онро бо номи дини мубини ислом пӯшиш медиҳанд, маҳкум намуда, зарурати идомаи муборизаи сарҷамъонаи беамонро алайҳи терроризм қотеъона таъкид менамояд», – омадааст дар барқияи Эмомалӣ Раҳмон.
Дар фарҷом ба мардуми дӯсти Покистон ва наздикони фавтидагон ҳамдардии амиқ ва ба маҷрӯҳшудагон орзуи шифои оҷилу комил изҳор шудаааст.
Қобили зикр аст, ки таркише дар мақбараи Лаъл Шаҳбоз Қаландар, дар ҷануби Покистон ҷони 80 одамро рабуда, беш аз 150 тани дигарро захмӣ кард. Дар ин зиёратгоҳи сӯфиёни шаҳри Сехван-Шариф маргталабе миёни одамон худро таркондааст.
