Айбдоркунандаи давлатӣ аз суд дархост намуд, ки адвокат Бузургмеҳр Ёров боз ба 2 соли зиндон маҳкум карда шавад. Ӯ мутобиқи ду модда – «беэтиромӣ нисбати суд» ва «таҳқири намояндаи ҳокимият» айбдор карда мешавад. Қаблан Ёров ба 23 соди зиндон маҳкум шуда буд.
Ба қавли пайвандони судшаванда, ҳукм метавонад аллакай имрӯз содир шавад, чунки пагоҳ дар суд баррасии парвандаи дигар нисбати адвокат (қаллобӣ) оғоз мегардад. Ҳамагӣ нисбати Ёров се парвандаи ҷиноӣ боз шуда, аз рӯи парвандаи аввал ӯ ба 23 соли зиндон маҳкум шуд, парвандаи дуюм айни замон мавриди баррасӣ қарор дорад ва мурофиа аз рӯи парвандаи сеюм пагоҳ шурӯъ мешавад.
Заррина Набиева, ҳамсари Бузургмеҳр Ёров ба «Азия-Плюс» иттилоъ дод, ки дар мурофиаи имрӯза ҳеҷ касе аз хешону наздикони адвокат ҳузр надоштаанд, зеро онҳоро ба он роҳ надодаанд. Ба мурофиа танҳо модари Ёров даъват шуда, вале бинобар худро бад ҳис кардан, ӯ дар он иштирок карда натавонистааст. Ҷараёни мурофиаро онҳо аз мушвоири халқӣ шунидаанд, ки ба сифати шоҳид даъват шуда будааст.
Моҳи октябри соли гузашта нисбати адвокати аллакай ба 23 соли зиндон маҳкумшуда Бзургмеҳр Ёров Прокуратураи генералӣ дар асоси моддаи 356-и Кодекси ҷиноятии Тоҷикистон (Таҳдид ё зуроварӣ вобаста ба амалбарории адолати судӣ, таҳқиқ ё тафтиши пешакӣ) парванда оғоз карда буд. Парванда пас аз баҳси айбдоркунандаи давлатӣ бо Бузургмеҳр оғоз шуда буд.
Қобили зикр аст, ки суд Бузургмеҳр Ёровро мутобиқи 5 модда Кодекси ҷиноии ҶТ гунаҳкор эътироф намуда, ба 23 соли зиндон маҳкум кард. Ӯ ҳамчунин ба муддати панҷ сол баъди озод шудан аз зиндон аз ҳуқуқи машғул шудан ба фаъолияти адвокатӣ маҳрум карда шуд.
Рӯзи 27 сентябр зимни суханронии ниҳоии худ дар мурофиаи судӣ адвокат Бузургмеҳр Ёров изҳор карда буд, ки «ӯ на ифротгаро, балки адвокат буда, ба ҳимояи аъзои ҲНИТ на аз рӯи муҳаббату самимият ба онҳо, балки аз рӯи тақозои касб пардохтааст».
Бузургмеҳр Ёров санаи 28 сентябри соли 2015 дар дафтари кории коллегияи адвокатҳои «Сипар» боздошт шуда, он замон ба ҳимояи манфиатҳои 7 узви боздоштшудаи Ҳизби фаъолияташ мамнӯъи наҳзати исломии Тоҷикистон машғул буд.
