Мулоқоти навбатии Президенти Тоҷикистон Эмомалӣ Раҳмон бо зиёиёни эҷодкори кишвар рӯзи якшанбе, 19 март дар маҷмааи «Кохи Наврӯз»-и пойтахт баргузор мешавад.
Тавре ба «Азия-Плюс» як манбаъ аз ҳукумати ҷумҳурӣ дар ин робита иттилоъ дод, дар муқоиса бо солҳои пешин ин вохӯрӣ бо иштироки шумори нисбатан камтари намояндагони зиёиёни кишвар доир мегардад.
Ба иттилои манбаъ, ба ин мулоқот бо президент беш аз 200 нафар намояндагони иттиҳодияҳои эҷодӣ ва олимон даъват шудааанд. Солҳои пеш ба ин вохӯрии маъмулӣ бо сарвари давлат ҳудуди 400 нафар намояндагони зиёиёни тоҷик даъват мешуданд.
Қобили зикр аст, ки мулоқоти сарвари давлат бо зиёиёни кишвар ҳамасола маъмулан дар остонаи ҷашни Наврӯз доир гардида, дар он масоили муҳими мавриди таваҷҷуҳи ҷомеа ва пешниҳодҳои нав оид ба беҳбуди вазъ дар бахшҳои илму маориф ва адабиёту фарҳанг баррасӣ мешаванд.
Аммо таҷриба гувоҳ аст ва ВАО ҳам чандин маротиба дар ин бора навиштанд, ки дар вохӯрӣ бо президент аз ҷониби зиёиён пешниҳодҳои созанда қариб ба мушоҳида намерасанд.
Пас аз суханронии президент муколама бо ҳозирин оғоз гардида, дар аксари вақт нафарони ба президент муроҷиаткарда ба таърифу тавсифи ӯ мепардозанд, ҳарчанд худи президент борҳо дархост карда буд, ки ба ин амалҳо хотима бахшида шавад.
