Дар Вазорати рушди иқтисод ва савдо дар доираи Барномаи рушди низоми молиявӣ дар минтақаҳои деҳоти Тоҷикистон ва Барномаи маблағгузории манзил маросими имзои Созишнома оид ба пешниҳоди кумаки молиявӣ ба бонкҳо ва ташкилотҳои қарзии хурди Тоҷикистон ба маблағи 7 миллион евро, инчунин оид ба оғози фазаи дуюми Барномаи маблағгузории манзил баргузор гардид.
Созишномаи мазкурро аз ҷониби ҳукумати ҶТ вазири рушди иқтисод ва савдо Неъматулло Ҳикматуллозода имзо намуд. Дар маросими имзои Созишномаҳо роҳбари намояндагии Бонки олмонии рушд (KfW) дар Тоҷикистон хонум Кристин Лаабс, инчунин намояндагони бонк ва ташкилотҳои қарзии хурди Тоҷикистон ширкат варзиданд.
Барномаҳои мазкур аз ҷониби Бонки олмонии рушд (KfW) дар доираи ҳамкории дуҷонибаи молиявӣ бо Тоҷикистон маблағгузорӣ мешавад. Барнома аз ҷониби Вазорати рушди иқтисод ва савдо пешниҳод намудани маблағи молиявиро на камтар аз 1.25 миллион евро ба ҳар кадом бонк ва ташкилоти қарзии хурд, ки интихоби пешакии дақиқро барои додани қарз бо асъори миллӣ гузаштаанд, пешбинӣ менамояд.
Тибқи барномаи маблағгузории манзил муассисаҳои молиявӣ маблағҳои қарзро барои қарздиҳии хоҷагиҳои шахсӣ дар деҳот барои харид, сохтмон, таъмири асосӣ ва васеъ кардани масоҳати манзил истифода мебаранд.
Иштирокчиёни Барномаи мазкур, ки ба онҳо қарзҳои манзилӣ дода хоҳад шуд, бонкҳо ва ташкилотҳои қарзии хурди ҷумҳурӣ, ба мисли Арванд, Имон Интернешнл, Эсхата ва Аввалин бонки хурди молиявӣ мебошанд. Ҳамчунин, иштирокчиёни Барнома қарзҳои манзилиро ҳам аз ҳисоби маблағҳои Барнома ва ҳам аз ҳисоби маблағҳои худ ҷудо хоҳанд кард.
