Моҳи январи соли равон дар газетаи «Азия-Плюс» дар бораи бо манзили зист таъмин набудани собиқадори Ҷанги Бузурги Ватанӣ Леокадия Ковтун мавод ба нашр расида буд.
Дар остонаи ҷашни навбатии Рӯзи Ғалаба зимни суҳбат бо мо ӯ изҳор намуд, ки баъди нашри мавод ҳеҷ касе аз намояндагони ҳукумати ноҳия ё мақомоти шаҳрдории пойтахт назди ӯ наомадааст.
«Аз Шӯрои собиқадорони ҷангу меҳнати шаҳри Душанбе низ касе аҳволи маро напурсид, ҳарчанд ба наздикӣ ид аст, шояд даъват кунанд», – мегӯяд ӯ.
Орзуи ягонаи ӯ соҳиб шудани ба манзили худ дар пирӣ аст. Чор соли охир ӯ ҳамроҳи набераву абераҳояш аз як манзил ба манзили дигар мекӯчад, зеро худ хона надорад. Хонаи дуҳуҷрадори коркардаашро барои васеъ кардани манзил фурӯхта, вале сохтмон дар бинои хусусии манзилҳо солҳои тӯлонӣ ба таъхир афтодааст ва акнун ӯ маҷбур аст, ки дар дигар ҷойҳо сарпаноҳ биҷӯяд.
Давлат ба ӯ ҳамчун собиқадори ҷанг ҳеҷ гоҳ манзили зист надода, Леокадия Ковтун акнун мехоҳад, ки аз ин ҳуқуқи худ истифода барад, зеро мувофиқи қонун «Дар бораи собиқадорон» аз соли 1995, ба иштирокчиёни Ҷанги Бузурги Ватанӣ бояд дар навбати аввал манзил дода шавад.
