Ба муносибати ҷашни Рӯзи ҷавонони Тоҷикистон веломарафони ҷумҳуриявӣ доир мегардад, ки тамоми минтақаҳои кишварро ба пойтахт мепайвандад. Он тариқи 6 хатсайр гузаронида шуда, нуқтаи охиринаш шаҳри Душанбе хоҳад буд.
Бино ба маълумоти Кумитаи ҷавонон, варзиш ва сайёҳии назди ҳукумати ҷумҳурӣ, намояндагони вилоятҳо ва шаҳру ноҳияҳои тобеи марказ бо теъдоди 7 нафарӣ аз Хоруғ, Хуҷанд, Кӯлоб, Қӯрғонтеппа, Турсунзода ва Рашт ба шаҳри Душанбе ҳаракат намуда, ҳам дар веломарафони пойтахт, ҳамчун рамзи дӯстӣ ва ваҳдату якдилии ҷавонон, ҳамзамон дар рӯзи Давӣ миллӣ ва чорабиниҳои бошукӯҳи Ҳамоиши ҷавонону Рӯзи ҷавонони Тоҷикистон 23 май низ ба намояндагӣ аз номи ҷавонони минтақаҳои кишвар иштирок менамоянд.
Хатсайрҳои марафон:
Хоруғ – Шуғнон – Рӯшон – Ванҷ – Дарвоз – Шамсиддин Шоҳин – Кӯлоб – Восеъ – Данғара – Норак – Ваҳдат – Душанбе;
Хуҷанд – Спитамен – Истаравшан –Шаҳристон – Айнӣ – Варзоб – Душанбе;
Кӯлоб – Восеъ – Данғара – Норак – Ваҳдат – Душанбе;
Рашт – Нуробод – Роғун – Файзобод – Ваҳдат – Душанбе;
Кӯрғонтеппа – Абураҳмони Ҷомӣ – Хуросон – Рӯдакӣ – Душанбе;
Турсунзода – Шаҳринав – Ҳисор – Душанбе.
Ҳамчунин ба муносибати Рӯзи ҷавонони Тоҷикистон, ки санаи 23 май ҷашн гирифта мешавад, дар майдони «Дӯстӣ»-и пойтахт намоиши идона ва дар минтақаҳои кишвар консерту дигар чорабиниҳо баргузор мешаванд.
