Кормандони милитсия сокини пойтахти Қирғизистонро ба гумони даст доштан дар кӯшиши фурӯши беш аз 44 кило симоб дар вилояти Суғд боздошт намуданд.
Бино ба маълумоти сомонаи расмии ВКД Тоҷикистон, дар натиҷаи гузаронидани чорабиниҳои оперативӣ-ҷустуҷӯӣ кормандони ШВКД дар шаҳри Истаравшан далели муомилоти ғайриқонунии моддаҳои заҳрноки навъи «симоби металӣ»-ро ошкор намудаанд.
«Шаҳрванди Қирғизистон Касимбаев Бактибек Уркасимович ҳаракатҳои ҷинояткоронаи худро дар ҳудуди ҷамоати деҳоти Хистеварзи ноҳияи Б.Ғафуров содир намуда, дар ду навбат зарфҳои шишагин ва пластикии дар дохилаш маводи моеъи ҷилодиҳандаи нуқрагинро ба муомилот баровардааст», – омадааст дар маълумоти ВКД.
Гуфта мешавад, дастгиршуда дар маҷмӯъ 44 670 (чилучор килограмму шашсаду ҳафтод) грамм моддаи заҳрноки навъи «симоби металӣ»-ро ба фурӯш бароварда, бар ивази ҳар як килограми он 45 доллари ИМА талаб намудааст.
Зимнан зикр мегардад, ки дар ҳаракатҳои Касимбаев Б.У. таркиби ҷинояти пешбиникардаи моддаи 206 Кодекси ҷиноятии Тоҷикистон ҷой дошта, дар асоси ҳамин модда нисбати гумонбаршаванда парвандаи ҷиноятӣ оғоз карда шуда, дар ҳабси пешакӣ қарор дорад.
