Миҷгона Ҳалимова, журналисти хабаргузории «Озодагон», ки барои хабар надодан дар бораи ҷиноят ҷаримабандӣ шуда буд, қисмате аз маблағи ҷаримаро пардохт намуд. Дар ҷамъоварии ин маблағ рӯзноманигорон ва фаъолони ҷомеа ба ӯ кумак карданд.
Бо талошҳои рӯзноманигорон барои кумак ба Миҷгона 18 ҳазору 186 сомонӣ маблағ ҷамъоварӣ шуд. Дар ҷамъоварии маблағ ҳамчунин муҳоҷирони кории тоҷики машғули кор дар Русия низ саҳм гузоштанд.
Маблағи ҷамъоваришударо Миҷгона Ҳалимова ҳамроҳи Муҳайё Нозимова, роҳбари Эътилофи занони журналист дар яке аз шуъбаҳои «Амонатбонк» дар шаҳри Душанбе пардохт намуд.
Ёдрас мекунем, ки суди ноҳияи Исмоили Сомонӣ Миҷгона Ҳалимоваро мутобиқи моддаи 347-и КҶ ҶТ (хабар надодан дар бораи ҷиноят ё пинҳон доштани он) гунаҳкор эътироф намуда, ҷаримабандӣ кард. Хабарнигори агентии иттилоотии «Озодагон» бояд дар ҳаҷми 25 ҳазор сомонӣ ҷарима супорад. Ба хотири амнияти худи рӯзноманигор доир ба ҷузъиёти баррасии парвандаи мазкур маълумот дода намешавад.
«Қисмати зиёди ҷарима бо кумаки дӯстону ҳамкорон ва одамони хайрхоҳу меҳрубон пардохта шуд, – мегӯяд Миҷгона. – Ба ҳар нафаре, ки маро дар лаҳзаи мушкил танҳо нагузошт, миннатдорӣ изҳор карда, аз он хушнудам, ки то ҳол дар дилҳо самимияту бовар ба мардум боқӣ мондааст».
Миҷгона Ҳалимова то соли 2015 ба ҳайси хабарнигори нашрияи Ҳизби фаъолияташ манъшудаи наҳзати исломии Тоҷикистон – газетаи «Наҷот» ва сомонаи ҳизб – nahzat.tj фаъолият дошт. Пас аз қатъи фаъолияти нашрияи ҳизб Миҷгона дар хабаргузории мустақили «Озодагон» ба кор шурӯъ намуд.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
