Прокурори генералии Тоҷикистон Юсуф Раҳмон изҳор дошт, ки аз ҷониби сохторҳои давлатӣ ба оила ва хешовандону наздикони аъзои ҳизбу ҳаракатҳои мухолифи ҳукумати кишвар ҳеҷ гуна фишор оварда намешавад.
«Аммо дар доираи парвандаи ҷиноӣ аъзои оила, пайвандону наздикони аъзои созмонҳои ифротгаро ва террористие чун «Гурӯҳи 24» ва ғайра бозпурсӣ шуда, онҳо зери ҳеҷ гуна фишоре қарор намегиранд», – иброз дошт зимни нишасти хабарӣ прокурори генералӣ.
Юсуф Раҳмон ҳамчунин иттилоъ дод, ки нисбати ҳамаи шаҳрвандони кишвар, ки аз ҷониби созмонҳои террористӣ ҷалбу ба Ироқу Сурия сафарбар шудаанд, дар Тоҷикистон парвандаи ҷиноӣ боз шуда, онҳо мавриди пайгард қарор доранд ва баъди дастгир гардидан муҷозот мешаванд.
«Пеш аз ба ҷанг рафтан, оқибатҳояшро фикр кардан зарур буд, – қайд кард ӯ. – Надонистани қонун аз ҷавобгарӣ озод намекунад. Иштирок дар ҷангҳо дар сафҳои террористон ҷиноят аст. Террористон бахшида намешаванд. Онҳо мустақилона баргашта наметавонанд, онҳоро дастгир ва ба ихтиёри мо месупоранд ва мо онҳоро ба ҷавобгарии ҷиноӣ ҷалб мекунем. Онҳо барои ҷамъият ва давлат хатар эҷод мекунанд. Шояд занону кӯдакон истисно шаванд».
Прокурори генералӣ итминон дод, ки дар сурати боздошти собиқ фармондеҳи ОМОН Гулмурод Ҳалимов, ки ба сафҳои Давлати исломӣ пайваст, дар ин хусус ба васоити ахбори умум хабар медиҳад.
