Дар маркази маъмурии ВМКБ – шаҳри Хоруғ майдони нав барои кӯдакон мавриди баҳрабардорӣ қарор гирифт.
Дар маросими ифтитоҳи майдон директори департаменти фурӯш ва маркетинги ширкати «Помир Энержи» Отамшо Хушқадамов изҳор намуд, ки иншооти мазкур ба муносибати 15-солагии таъсисёбии ширкат ба кӯдакон туҳфа шудааст.
Намояндаи ширкат ҳамчунин зикр кард, ки дар соли ҷашнӣ ин аввалин чунин чорабинӣ набуда, як моҳ пеш бо ташаббуси ширкат барои дарёфти «Ҷоми Помир Энержи» мусобиқаи шоҳмотбозӣ низ баргузор гардид.
«Ду ҳафта пеш дар шаҳри Хоруғ ва ноҳияҳои Рӯшону Ишкошим ҷашнвораҳои ҷавонону наврасон низ созмон дода шуд, ки ҳадафи аслии он ба ҷавонон талқин кардани муносибати эҳтиёткорона ба муҳити зист, сарчашмаҳои энергия, тарзи ҳаёти солим, муносибати ҷиддӣ ба интихоби ихтисос ва азхудкунии касбу ҳунар аст», – гуфт Хушқадамов.
