Президенти Тоҷикистон Эмомалӣ Раҳмон ба муносибати Рӯзи дониш ва ифтитоҳи бинои нави Академияи Вазорати корҳои дохилии Тоҷикистон дар ҳузури ҳайати омӯзгорону донишҷуёни ин муассисаи олии таълимӣ суханронӣ намуд.
Бино ба иттилои хадамоти матбуоти сарвари давлат, зимни суханронӣ Президенти мамлакат изҳор дошт, ки дар охири асри бист ва оғози асри бистуяк сайёраи мо ба як қатор таҳдиду хатарҳои нав, аз қабили экстремизму терроризм, ҷангҳои мазҳабӣ, амалҳои даҳшатноки террористӣ, густариши ҷинояткории муташаккили фаромиллӣ, қочоқи маводи мухаддир, инчунин, тағйирёбии иқлим, шиддат гирифтани раванди аз нав тақсим кардани дунё барои ба даст даровардани захираҳои табиӣ аз ҷониби абарқудратҳо ва мушкилоти дигар рӯ ба рӯ гардид.
«Чунин вазъ мардуми сайёра, аз ҷумла моро водор месозад, ки ба масъалаи ҳифзи сулҳ, таҳкими пояҳои давлатдорӣ ва мустаҳкам намудани иқтидори мудофиавии давлат ҳамчун шарти муҳимтарини пойдории амният ва суботу оромии ҷомеа аҳаммияти хосса зоҳир намоем», – иброз дошт ӯ.
Эмомалӣ Раҳмон ҳамчунин қайд кард, ки «халқи мо ба қадри сулҳу оромӣ бештар мерасад, зеро мардуми тоҷик бо айби як идда ашхоси хоину зархарид, роҳбарони баъзе азҳоби сиёсӣ ва хоҷагони хориҷии онҳо, ки мехостанд дар Тоҷикистон давлати исломӣ бунёд намуда, мазҳаб ва фарҳанги бегонаро ба сари мардуми мо бор кунанд, ба гирдоби ҷанги шаҳрвандии таҳмилӣ гирифтор шуда, хисороти зиёди моддиву маънавиро паси сар намуданд».
Сарвари давлат аз омӯзгорони муассисаҳои таълимӣ даъват кард, ки ҳангоми дарси сулҳ бояд ба шогирдони худ аҳаммият ва нақши сулҳу ваҳдати миллиро барои суботи ҷомеа, рушди муназзаму муътадили кишвар ва пойдориву устувории давлат шарҳ диҳанд ва наврасону ҷавононро дар рӯҳияи сулҳдӯстиву сулҳпарварӣ тарбия намоянд.
Сипас Эмомалӣ Раҳмон дар маросими мавриди баҳрабардорӣ қарор додани бинои маъмурию таълимӣ ва иншооти Академияи Вазорати корҳои дохилии Тоҷикистон иштирок кард.
ИЗОБРАЖЕНИЕ
ИЗОБРАЖЕНИЕ
Ба сохтмони ин бино Президенти Тоҷикистон 20 июни соли 2014 санги асос гузошта, барои анҷоми марҳилаи аввали сохтмони он аз ҳисоби буҷети давлатӣ ва ВКД Тоҷикистон ҳудуди 70 млн. сомонӣ маблағ ҷудо шудааст.
ИЗОБРАЖЕНИЕ
ИЗОБРАЖЕНИЕ
Айни замон дар Академияи ВКД Тоҷикистон 2 ҳазору 200 нафар курсантҳо таҳсил мекунанд, ки 156 нафарашон духтарон мебошанд.
