Корхонаи бузургтарини истеҳсоли металлҳои қиматбаҳои Тоҷикистон – корхонаи муштараки «Зарафшон»-и Тоҷикистону Чин мавриди таъмиру навсозӣ қарор дорад.
«Айни замон хати технологии корхона мавриди навсозӣ қарор дошта, бо ин сабаб истеҳсоли металл муваққатан боздошта шуд», – хабар дод ба «Азия-Плюс» Бахтиёр Шарипов, сардори Раёсати саноати кӯҳӣ-металлургии Вазорати саноат ва технологияҳои нави ҷумҳурӣ.
Ба гуфтаи ӯ, фаъолияти корхона дар соли гузашта муваффақона ҷамъбаст шуда, айни замон дастгоҳу таҷҳизоти технологӣ нав мешаванд, ки итмоми ин корҳо ояндаи наздик дар назар аст.
Шарипов қайд кард, ки ҳеҷ касе аз кормандони корхонаи «Зарафшон» ба рухсатии бемузд фиристода нашуда, ҳамаи онҳо дар корҳои таъмиру навсозии хати технологии корхона иштирок доранд.
Қобили зикр аст, ки пештар дар чанде аз васоити ахбори умум дар бораи қатъи кори КМ «Зарафшон» ва ба рухсатии бемузд фиристодани коргарони он маълумот интишор гардида, ин гуфтаи корманди вазорат онро рад мекунад.
Зимнан қайд шуд, ки ҳамчунин масъалаи барои корхона дароз кардани муҳлати иҷозатнома доир ба коркарди чор кон – «Таррор», «Ҷилав», «Хирсхона» ва «Олимпийское» аз дар ҳоли баррасӣ қарор дорад.
Корхонаи муштараки Тоҷикистону Чин – «Зарафшон» дар заминаи Комбинати маъдани тиллои Тоҷикистон, ки соли 1990 ба кор даромад, таъсис ёфта, он замон ашёи хом (консентрат) истеҳсол мекард. Моҳи сентябри соли 1994 ҳамроҳ бо ширкати бритониёии «Common wealth and British Minerals, PLC» бо шарти 51:49 корхонаи муштараки «Зарафшон таъсис дода шуда, моҳи январи соли 1996 маҳсулоти заминавии корхона баъди ба истифода додани навбати аввал 2 тонна тиллои тамғаи «Доре»-ро дар як сол ташкил дод.
Соли 2007 саҳмияҳои корхонаро ширкати Zi jin Mining Group Co Ltd.-и Чин харида, дар натиҷа акнун 75 фоизи саҳмияҳо ба ин ширкат ва 25 фоизи он ба ҳукумати Тоҷикистон тааллуқ доранд. Корхона аз воҳиду сохторҳои зиёде иборат буда, шумори коргаронаш беш аз 2 ҳазор нафарро ташкил медиҳад.
Манбаи ашёи хоми корхона – конҳои «Таррор», «Ҷилав», «Хирсхона» ва «Олимпийское», ҳамчунин як қатор конҳои хурди маъданӣ дар ноҳияи Панҷакенти вилояти Суғд ба шумор рафта, мутахассисони ширкат корҳои иктишофи геологиро дар қитъаҳои ба корхона ҷудошуда идома медиҳанд.
