Бар асари боришоти шадид дар минтақахи кӯҳистони ҷумҳурӣ хатари тармафароиву сангреза вуҷуд дошта, дар роҳҳои мошингарди Душанбе-Айнӣ, Душанбе-Сангвор, Хоруғ-Ишкошим вазъият барои ҳаракати воситаҳои нақлиёт хатарнок аст.
Бино ба маълумоти маркази матбуоти Кумитаи ҳолатҳли фавқулода, шабонарӯзи гузашта дар ноҳияҳои Дарвоз, Рӯшон, Шуғнон ва Ишкошими ВМКБ, ҳамчунин ноҳияҳои Сангвор ва Лахш, ҳамчунин аз километри 54 то 72-уми роҳи автомобилгарди Душанбе – Хуҷанд ҳодисаҳои фаромадани тарма ва сангреза ба қайд гирифта шудааст.
Барои тозакунии роҳ аз ҷониби хадамоти дахлдори Вазорати нақлиёт ва ширкати Innovative Road Solutions (IRS) тезникаи махсус сафарбар шудааст, ки ба корҳои рафъи оқибатҳои офати табиӣ машғуланд. Ситодҳои бартараф кардани ҳолати фавқулода шабонарӯзӣ фаъолият доранд.
Гуфта мешавад, рӯзи 15 феврал бар асари лағзиши тарма дар километри 69-уми роҳи мошингарди Душанбе-Хуҷанд наҷотдиҳандагони Кумита дар ҷараёни роҳандозии корҳои садамавиву наҷот аз қабати ғафси барф ҳафт нафарро берун кашида, ҷонашонро аз хатари марг наҷот доданд. Ин ҳафт нафар савори ду мошин аз Хуҷанд ба самти Душанбе дар ҳоли ҳаракат буданд.
Дар ҳамин иртибот Кумитаи ҳолатҳои фавқулодда аз аҳолии кишвар хоҳиш мекунад, ки аз сафар ба манотиқи хавфнок, роҳҳои тармахезу сангрези куҳӣ худдорӣ варзанд. Ба ронандагон тавсия дода мешавад, ки дар роҳҳо ҳангоми ҳаракат масофаро ҷиддан риоя намоянд, суръатро боло набаранд.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
