Пас аз поинравии семоҳа моҳи июли соли равон ҳаҷми интиқоли пул аз хориҷи кишвар ба Тоҷикистон барқарор шуд.
«Дар муқоиса бо ҳамин давраи соли гузашта нишондиҳандаи афзоиши ҳаҷми интиқоли маблағ айни замон 7%-ро ташкил медиҳад, яъне нисбат ба соли пешин тахминан 90 млн. доллар бештар маблағ ворид шуд», – хабар дод зимни нишасти хабарии рӯзи 25 июл дар Душанбе раиси Бонки миллии Тоҷикистон Ҷамшед Нурмаҳмадзода.
Ӯ қайд кард, ки давоми моҳҳои апрел-июни соли ҷорӣ коҳиши ҳаҷми интиқоли маблағҳо нисбат ба ҳамин дарви соли 2017 ба қайд гирифта шуда, айни замон вазъ ба эътидол омад ва афзоиш оғоз гардид.
Ёдрас мекунем, ки аз рӯи натиҷаҳои соли гузашта ҳаҷми интиқоли маблағ ба Тоҷикистон аз хориҷи кишвар наздики 2,6 млрд. долларро ташкил дод.
Раиси Бонки миллии Тоҷикистон изҳор намуд, ки тақрибан 86%-и маблағҳо бо рубли русӣ ворид шуданд.
Қобили зикр аст, ки шурӯъ аз соли 2016 маблағҳои бо рубл фиристодашуда ба Тоҷикистон танҳо бо арзи миллӣ – сомонӣ дода мешаванд.
Ҷамшед Нурмаҳмадзода таъкид дошт, ки тадбири мазкур ба нигаҳдории қурби арзи миллӣ дар сатҳи муайян мусоидат намуда, Бонки миллӣ алҳол аз ин механизм даст кашиданӣ нест.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
