Дар Суди олии Тоҷикистон рӯзи 17 сентябр нисбати раҳбарияти ширкати “Умед-88” ҳукм содир шуд.
Муассиси ширкат Раҷабалӣ Одинаев ба иттиҳоми азхудкунии воситаҳои давлатӣ, камомад ва ғайримақсаднок истифода бурдани қарз ба 24 соли зиндон ва директори ширкат Идибек Ибрагимов ба 22 соли зиндон маҳкум шуданд, хабар дод ба “Азия-Плюс” як манбаъ аз Суди олии ҷумҳурӣ.
Адвокатҳои судшавандагон аз шарҳу тавзеҳи масъала худдорӣ варзиданд.
Раҳбарияти ширкати “Умед-88” 14 октябри соли гузашта боздошт шуда буд. Он замон зикр гардида буд, ки ширкат аз Вазорати молия дар ҳаҷми 170 млн. сомонӣ қарз гирифта, муддати қариб 4 сол аст, ки онро ба давлат баргардонида наметавонад.
Охири моҳи майи соли ҷорӣ парвнада ба баррасии суд дода шуд. Моҳи июл раиси Суди олии Тоҷикистон Шермуҳаммад Шоҳиён ба журналистон хабар дод, ки роҳбари ширкати “Умед-88” дар содир намудани ҷиноят аз рӯи 7 модда гумонбар дониста шуда, бо сабаби махфӣ будани баъзе ҳолатҳои ҷиноятҳои Одинаев, мурофиаи судӣ пушт дарҳои пӯшида баргузор мешавад.
Ширкати “Умед-88” муддати беш аз 20 сол ба воридот ва фурӯши чаканаи маҳсулоти нафтӣ дар Тоҷикистон машғул буд. Ширкат асосан аз Русия ва Қазоқистон бензин ва сӯзишвории дизелӣ ворид мекард.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
