Маросими расмии ифтитоҳи роҳи танобӣ дар шаҳри Хуҷанд бо иштироки Сарвари давлат Эмомалӣ Раҳмон санаи 2 апрел доир гардида, лекин рӯзи дигар он аз кор бозмонд. Меҳмонони шаҳр ва корбарони шабакаҳои иҷтимоӣ сабабҳои онро меҷӯянд. Яке аз камбуди барқ мегӯяду дигарӣ аз вайрон шудани таҷҳизоти роҳ ҳарф мезанад.
Котиби матбуоти мақомоти шаҳрдории Хуҷанд Маъмур Юсуфзод дар суҳбат бо хабарнигори “Азия-Плюс” ин овозаҳоро рад намуда, хабар дод, ки дар роҳ корҳои техникӣ гузаронида мешаванд.
“Он ҷо баъзе корҳои начандон назарраси сохтмон ва техникӣ ҷараён дошта, роҳ аввали ҳафтаи оянда ба кор медарояд”, – иброз дошт номбурда.
Бино ба гуфтаи ӯ, арзиши равуо тариқи роҳи танобии мазкур алҳол муайян набуда, бо оғози кори он маблағи он муқаррар хоҳад шуд.
Дар ҳамин ҳол, сокинони ноҳияҳои вилояти Суғд аз он изҳори норозигӣ мекунанд, ки таавассути шабакаи телевизион аҳолиро аз ин вазъ огоҳ накарда, баръакс онро таблиғ (реклама) мекунанд.
“Ба ҷойи реклама аҳолиро аз муваққатан кор накардани роҳ огоҳ кардан хубтар мебуд. Тариқи ҳамаи шабакаҳо дар бораи ин роҳ роликҳо нишон медиҳанд. Бо дидани ин роликҳо кӯдакон дархост карданд, ки ба тамошои роҳ равем. Мо аз шаҳри Исфара 110 километрро тай намуда, барои тамошои роҳ омадем, лекин маълум шуд, ки он алҳол кор намекардааст”, – мегӯяд бо тассуф Зафар Қодиров, як сокини шаҳри Исфара.
“Роҳи танобӣ” дар шаҳри Хуҷанд аз Боғи фарҳангӣ-фароғатии ба номи Камоли Хуҷандӣ то Маҷмааи шоҳ Исмоили Сомонӣ аз болои дарёи Сир дар масофаи беш як километр тӯл мекашад.“Роҳи танобӣ” аз ҷониби соҳибкорони ватанӣ бунёд карда шуда, дорои 47 кабина бо ғунҷоиши 4 нафар, аз ҷумла 7 кабинаи хизматрасонии олӣ мебошад. Ин роҳ дар як вақт ба 160 нафар хизмат мерасонад. Баландии роҳи танобӣ дар сатҳи дарё 35 метрро ташкил медиҳад.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
