Мувофиқи маълумоти Вазорати кишоварзӣ, имсол дар Тоҷикистон аз ҳосили баланди зироати полезӣ интизорӣ меравад. Дар натиҷа нархи тарбузу харбуза қариб як баробар поин рафтааст.
Агар аввали мавсими соли гузашта тарбузи андозааш миёна 20 сомонӣ нарх дошт, пас имсол онро метавон бо 10 сомонӣ харидорӣ намуд.
Ғайр аз ин, имсол ҳосили ҳандалак хел хуб шуда, як донаи онро бо арзиши 2-4 сомонӣ харидан мумкин аст. Нархи харбузаҳои маъмулӣ аз 10 сомонӣ сар мешавад.
Имрӯз дар заминҳои кишти вилояти Хатлон мавсими ҷамъоварии ҳосили зироатҳои полезӣ пурҷӯшу хурӯш ҷараён дорад. Аз моҳи август ба ҷамъоварии ҳосили зироати полезии заминҳои лалмӣ натанҳо дар Хатлон, балки дар водии Ҳисор низ оғоз мекунанд.
Ҳамин тариқ, метавон гуфт, ки имсол тарбузу харбуза дар бозорҳои Тоҷикистон фаровон шуда, нархи онҳо метавонад боз ҳам поинтар равад.
Бино ба маълумоти Раёсати растанипарварии Вазорати кишоварзии Тоҷикистон, соли равон зироатҳои полезӣ дар майдони беш аз 18 ҳазор гектар кишт шудаааст, ки нисбат ба соли гузашта 2 ҳазор гектар бештар мебошад.
Гуфта мешавад, то имрӯз аз майдони 752 гектар беш аз 20 ҳазор тонна ҳосили зироатҳои полезӣ ҷамъоварӣ шудааст, ки дар муқоиса бо нишондиҳандаи ҳамин давраи соли гузашта 12,3 ҳазор тонна зиёдтар аст.
“Ҳосилнокии зироати полезӣ имсол ба ҳисоби миёна 268,4 сентнер аз як гектарро ташкил медиҳад, ки нишондиҳандаи хуб аст”, – мегӯянд дар Вазорати кишоварзӣ.
Тавре маълум аст, нисбат ба заминҳои обёришаванда ҳосилнокӣ дар заминҳои лалмӣ 2 маротиба камтар буда, аз заминҳои обёришаванда метавон то 400 сентнер аз як гектар ҳосил ба даст овард.
“Мувофиқи тавсияҳо дар 1 гекатр 9 ҳазор бех кишт кардам, – мегӯяд аз таҷрибааш Қавлоншо, фермер аз вилояти Хатлон. – Тарбуз аз як бех 9 дона ҳосил медиҳад. Парвариши тарбуз кори даромаднок аст, вале танҳо дар ҳамон ҳолат, ки агар қисмате аз ҳосил ба хориҷи кишвар бароварда шуда, қиматтар фурӯхта шавад. Бо нархи 8-10 сомонӣ барои 1 дона бошад, хоҷагиҳои хурд зиён мебинанд. Барои парвариши тарбуз дар 1 гектар ман 30 ҳазор сомонӣ маблағ сарф кардам”.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
