Бо қарори суди ноҳияи Совет сабти ақди никоҳи шаҳрванди Тоҷикистон, ҷавони 23-сола бо ҳамсолаш аз Волгоград бекор карда шуд. Бо даъво дар ин хусус прокуратура муроҷиат кардааст. Тавре худи духтар шарҳ додааст, шаҳрванди хориҷӣ бунёди оилаи мустаҳкамро пешниҳод намуда, лекин баъди тӯй дарҳол гурехтааст, хабар медиҳад Muhojir.news.tj истинод ба портали «Обзор».
Ақди никоҳ 18 январи ҳамин сол сабт шудааст. Духтар муддати начандон тӯлонӣ бо шаҳрвнади Тоҷикистон муносибат дошта, ба ӯ ошиқ мешавад ва аз ин рӯ, ба пешниҳоди ӯ дар бораи сабти ақди никоҳ розӣ мешавад. Лекин баъди бақайдгирии муносибатҳо ҳамсари ҷавон рӯ ба фирор меорад. Сабти ақди никоҳ ба ӯ танҳо барои гирифтани санади иҷозаи зисти муваққатӣ дар Русия лозим будааст.
Қайд мешавад, ки қаблан унвонҷӯй (аспирантка)-и яке аз мактабҳои олии шаҳри Волгоград бо донишҷӯи ҳамин муассиса аз Осиёи Марказӣ сабти никоҳи қалбакӣ мекунанд, ки ин қонуншиканӣ дар самти қонунгузории муҳоҷират аз ҷониби мақомоти ҳифзи ҳуқуқ ошкор мегардад. Гурӯҳи ҷиноятпеша бо иштироки духтарону занон – сокинони Волгоград бо хориҷиён барои ба онҳо додани ҳуҷҷатҳо дар соҳаи муҳоҷират ақди никоҳи қалбакӣ мебастаанд. Аз ҳар кадоме аз “домодҳо” барои хизматрасониашон аз 100 то 120 ҳазор рубл маблағ мегирифтаанд.
Оқибатҳои муайян шудани ақди никоҳи қалбакӣ
Шаҳрванди хориҷӣ ба гумони ғолиб, мақоми имтиёзноки худро аз даст медиҳад. Ҳуҷҷатҳои амалкунандаи ӯ: Иҷозаи зисти муваққатӣ (РВП), Ҳуҷҷати иҷозаи зист (ВНЖ) ё шиносномаи шаҳрванди Русия бекор шуда, худиӯ метавонад ба ватан хориҷ шавад.
Вале ин маънои онро надорад, ки ба ӯ ҳатман вуруд ба Русияро манъ мекунанд. Баъди аз даст додани мақоми дахлдор шаҳрванди хориҷӣ боз метавонад барои гирифтани РВП ё дигар ҳуҷҷати иҷозатномавӣ барои ҳузур дар Русия талош намояд, лекин акнун бо асосҳои умумӣ.
Ҳолати муҳимро дар назар мебояд дошт: агар ба шаҳрванди хориҷӣ додани ҳуҷҷати иҷозаи зист рад карда шавад ё ҳуҷҷати пештар ба ӯ додашуда бекор шуда бошад, ӯ ба такроран пешниҳод намудани ариза дар бораи ба ӯ додани РВП на дертар пас аз як сол аз замони фаро расидани ҳолати дахлдор ҳуқуқ дорад.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
