Президенти Тоҷикистон вакили анҷумани пешазинтихоботии Ҳизби халқии демократии Тоҷикистон (ҲХДТ) интихоб шуд.
Тавре ба “Азия-Плюс” як манбаъ аз ҲХДТ хабар дод, Эмомалӣ Раҳмон дар конфронси вилоятии ҳизб дар Хоруғ вакил интихоб шудааст.
“Ба ин тариқ, ҷараёни интихоби вакилон ба анҷумани пешазинтихоботии ҲХДТ дар саросари кишвар ба охир расид, – қайд кард манбаъ. – Беш аз 1 ҳазор нафар тоҷикистониён вакили анҷуман интихоб шуданд”.
Қобили зикр аст, ки анҷумани пешазинтихоботии ҲХДТ, ки дар он аз пешбарии номзади ҳизби ҳоким ба мансаби президентӣ интизорӣ меравад, рӯзи 3 сентябр дар маҷмааи “Кохи Борбад” баргузор мешавад.
Ҳизби халқии демократии Тоҷикистон соли 1994 таъсис ёфта, роҳбари ҳизб раисҷумҳури Тоҷикистон Эмомалӣ Раҳмон аст. Айни замон шумори аъзои ҲХДТ беш аз 500 ҳазор нафарро ташкил медиҳад. Наздики 40%-и аъзои ҲХДТ ҷавонон мебошанд.
Аксари аъзои ҳукумат, вакилони ҳар ду палатаи парлумон ва маҷлисҳои маҳаллии вакилони халқи вилоят ва шаҳру навоҳии ҷумҳурӣ, раисони вилоят ва шаҳру навоҳии кишвар аъзо ё номзадҳои аз ҷониби ҲХДТ пешбаришуда мебошанд.
Ёдрас мекунем, ки интихоботи навбатии президенти Тоҷикистон ба рӯзи 11 октябри соли равон таъин шудааст.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
